जोतिबा डोंगर: कोल्हापूर जिल्ह्यातील श्रीक्षेत्र जोतिबा डोंगर येथे जिल्हा प्रशासनाने सुरू केलेली ई पास दर्शन व्यवस्था बंद करून परंपरेने सुरू असणारी दर्शन पध्दती सुरू करावी, अशी मागणी स्थानिक ग्रामस्थ, पुजारी हक्कदार उत्कर्ष समितीतर्फे पालकमंत्री सतेज पाटील यांच्याकडे निवेदनाद्वारे करण्यात आली आहे. पालकमंत्री श्री. पाटील यांनी जिल्हाधिकारी राहुल रेखावार यांची भेट घेऊन यासंबधी चर्चा करण्याचे आश्‍वासन ,स्थानिक ग्रामस्थ आणि पुजाऱ्यांना दिले.

जोतिबा डोंगरावर नवरात्रोत्सवापासून कोरोनामुळे जिल्हा प्रशासनाने भाविकांसाठी ई पास दर्शन व्यवस्था सुरू केली आहे. याचा भाविकांना गहन त्रास होतो आहे. अनेक भाविक गोंधळून जातात. तर काहींना हा ई पास कसा काढावा हे देखिल माहिती नसतं. या दर्शन व्यवस्थेमुळे सर्व धार्मिक परंपरा मोडीत निघून भाविकांच्या धार्मिक भावना दुखावल्या जात आहेत. ई पास दर्शन व्यवस्था कायमस्वरूपी बंद करून जोतीबाचे दर्शन घेण्यासाठी रांगेची पध्दतच सुरू करावी, अशी मागणी या निवेदनाद्वारे करण्यात आली. पालकमंत्री श्री. पाटील यांनी उद्या जिल्हाधिकाऱ्यांशी चर्चा करून यावर मार्ग काढू, असे आश्वासन दिले आहे.

या वेळी सरपंच राधा बुणे, कृष्णात बुणे, मच्छिंद्र बुणे, हक्कदार समितीचे अध्यक्ष नवनाथ लादे, आनंदा बुणे आदी उपस्थित होते. वयोवृद्ध भाविकांना केवळ कळसाचे दर्शन घेऊन परतावे लागते. त्यामुळे लांबून येणाऱ्या भाविकांचाही हिरमोड होतो. दरम्यान ही ई पास व्यवस्था आणखी पंधरा दिवस सुरू ठेवणार असल्याचे देवस्थान समितीने नुकतेच जाहीर केले आहे; परंतु या व्यवस्थेला जोतिबा डोंगर येथील स्थानिक ग्रामस्थ, पुजारी व गुरव समाजाचा विरोध आहे.