आंबोली: निसर्गरम्य आंबोलीतील वर्षा पर्यटनाचा आनंद घेण्यासाठी आलेला कोल्हापूर येथील एक जिल्हा परिषद कर्मचारी चारशे फूट खोल दरीत कोसळल्याची धक्कादायक घटना समोर आली आहे. अपघातग्रस्त व्यक्तीचे नाव राजेंद्र बाळासो सनगर (वय 45, रा. चिले कॉलनी, कोल्हापूर) असे असून ते कोल्हापूर जिल्हा परिषदेमध्ये कनिष्ठ सहाय्यक पदावर कार्यरत आहेत.

सनगर 400 फूट खोल दरीत कोसळले

दरम्यान, सनगर हे आपल्या 14 सहकाऱ्यांच्या टीमसोबत आंबोलीतील कावळेसाद परिसरात पर्यटनासाठी आले होते. यावेळी सर्वजण दरीकडे उलट दिशेने वाहणाऱ्या पाण्यात रुमाल उडवण्याचा आनंद घेत होते. त्याचवेळी, सनगर यांचा रुमाल थेट दरीच्या तोंडावर जाऊन पडला. रुमाल आणण्यासाठी गेले असताना दरीकाठाची जागा निसरडी असल्याने ते तोल जाऊन थेट सुमारे 400 फूट खोल दरीत कोसळले.

शोध मोहीम

दुसरीकडे, घटनेची माहिती मिळताच आंबोली पोलिसांनी तात्काळ घटनास्थळी धाव घेतली. मात्र, परिसरात दाट धुके आणि अंधार असल्याने मदतकार्यात मोठ्या अडचणी निर्माण झाल्या. परिणामी शोधमोहीम तात्पुरती थांबवावी लागली आहे. आंबोली पोलिसांच्या माहितीनुसार, उद्या (28 जून) सकाळी रेस्क्यू पथकाच्या सहाय्याने शोधमोहीम पुन्हा सुरु करण्यात येणार आहे.

सध्या परिसरात भीतीचे आणि हळहळ व्यक्त करणारे वातावरण आहे. सनगर यांचा शोध घेण्यासाठी प्रशासन सज्ज झाले असून हा अपघात पर्यटनाच्या सुरक्षिततेच्या दृष्टिकोनातूनही गंभीर बाब मानली जात आहे.