मुंबई : गेल्या काही दिवसांमध्ये वातावरणात कमालीचा बदल जाणवत असून कुठे पाऊस तर कुठे तापमानात वाढ होत आहे. भारतीय हवामान विभागाच्या (IMD) प्रादेशिक हवामान केंद्र मुंबई यांच्याकडून एक महत्त्वपूर्ण इशारा देण्यात आला असून उत्तर महाराष्ट्र, विदर्भासह मराठवाड्यात उष्णतेची लाट येण्याची शक्यता वर्तविण्यात आली आहे. (Heat Wave conditions over north Madhya Maharashtra & Marathwada during 30th March-01st April, 2022)

देशात 27 मार्चपासून राजस्थानमध्ये उष्णतेची लाट येणार असून त्यानंतर गुजरात, मध्य प्रदेशापर्यंत ती प्रवेश करेल असे सांगण्यात आले होते. तर पुढील तीन दिवसांत पश्चिम हिमालयीन प्रदेश आणि गुजरात राज्याकडून उष्णतेची लाट येण्याची शक्यता आहे. महाराष्ट्रातील (Maharashtra) जळगाव, औरंगाबाद, अहमदनगर, जालना, परभणी अन्य जिल्ह्यामध्ये उष्णतेची लाट जाणवेल, असा अंदाज वर्तवण्यात आला आहे. महाराष्ट्रात येत्या 5 दिवसांत काही भागात उष्णतेची लाट जाणवेल, असा इशारा हवामान विभागाने दिला आहे. तर 28, 29 आणि 30, 31 मार्च आणि 1 एप्रिल रोजी उष्णतेची लाट येईल असा अंदाज हवामान खात्याने (weather department) दिला आहे.

राज्यात उष्णता (Heat wave) आणखी वाढणार आहे. राज्यात तापमानात तब्बल 2 ते 3 अंशांनी वाढणार असून विदर्भात 28 ते 30 मार्च दरम्यान अमरावती, अकोला, चंद्रपूर, यवतमाळ या भागात उष्णतेच्या लाटेचा इशारा देण्यात आला आहे. राज्यात अनेक ठिकाणी 40 अंश डिग्री सेल्सियसपेक्षा तापमना गेलं आहे. सोलापूर, अहमदनगर, परभणीसोबत विदर्भात तापमानाचा पारा 40 पार आहे. त्यामुळे नागरिकांना काळजी घेण्याचं आवाहन करण्यात आलं आहे. बदलत्या वातावरणाचा आरोग्यावर परिणाम होत आहे. त्यामुळे नागरिकांनी काळजी घ्यायला हवी.

या जिल्ह्यात वाढणार पारा

28 मार्च : बुलडाणा, अकोला

29 मार्च : बुलडाणा अकोला, अमरावती

30 मार्च : अहमदनगर, औरंगाबाद, जळगाव, जालना, परभणी, अकोला, वाशिम, हिंगोली, यवतमाळ, अमरावती

31 मार्च : जळगाव, औरंगाबाद, अहमदगर, जालना, परभणी, हिंगोली, बुलडाणा, अकोला, यवतमाळ, चंद्रपूर

1 एप्रिला : जळगाव, औरंगाबाद, अहमदनगर, जालना, परभणी, हिंगोली