Ratnagiri Cylinder Blast: रत्नागिरीत आज सकाळी 5 च्या सुमारास गॅस सिलेंडरचा मोठा स्फोट झाला आहे. येथील शिरगाव ग्रामपंचायत हद्दीत शेट्ये नगर येथील एका दुमजली इमारतीत पहिल्या मजल्यावर पहाटेच्या सुमारास सिलेंडरचा भीषण स्फोट झाला.

स्फोट एवढा मोठा होता की घराच्या भिंती कोसळल्या. या घटनेत एकाचा मृत्यू झाल्याची माहिती मिळत आहे. या घरात चौघे जण अडकले असल्याची माहिती असून यातील दोघांना बाहेर काढण्यात आले आहे. इतर दोघांना बाहेर काढण्याचे प्रयत्न सुरू आहे.

शेट्ये नगर येथे राहणारे अश्फाक काझी यांच्या घरात सिलेंडर स्फोट होऊन ही आग लागली आहे. आतापर्यंत तीन लोकांना जिल्हा रुग्णालयात दाखल करण्यात आले आहे.

स्फोटाची माहिती मिळताच तीन रुग्णवाहिका आणि पोलीस पथक तसेच अग्निशामक दलाचे कर्मचारी मदतीसाठी घटनास्थळी पोहचले आहेत.

पोलिसांनी दिलेल्या महितीनुसार अश्फाक काझी हे रिक्षा चालक आहेत. ते पहाटे घरी आल्याने त्यांनी घरातील लाइट लावताच हा भीषण स्फोट झाला.

तब्बल दोन किलोमीटरच्या परिसरात या स्फोटाचा आवाज ऐकू गेला. स्फोट इतका भीषण होता की आजुबाजूच्या घरांवरच्या काचा फुटल्या असून यामुळे काही नागरिक जखमी झाले आहेत.