संपूर्ण महाराष्ट्रात गणेशोत्सवाच्या उत्साहाचे वातावरण पसरले आहे. विशेषतः कोकणात या सणाचा वेगळाच रंग आणि लगबग पाहायला मिळतो. मुंबईसह देशातील विविध भागातून कोकणातील गावांना जाणाऱ्या गणेशभक्तांसाठी मोठा दिलासा देणारा निर्णय उपमुख्यमंत्री एकनाथ शिंदे यांनी घेतला आहे.

एकनाथ शिंदे यांच्या आदेशानुसार, 23 ऑगस्ट ते 8 सप्टेंबर या कालावधीत मुंबई-बेंगळुरू राष्ट्रीय महामार्ग, मुंबई-गोवा राष्ट्रीय महामार्ग तसेच सार्वजनिक बांधकाम विभाग आणि महाराष्ट्र राज्य रस्ते विकास महामंडळाच्या अखत्यारीतील रस्त्यांवरील सर्व टोल नाक्यावर गणेशोत्सवासाठी कोकणात जाणाऱ्या वाहनांना टोलमाफी देण्यात येणार आहे. यात खास करून एसटी बसेससुद्धा समाविष्ट आहेत.

यासाठी “गणेशोत्सव 2025 – कोकण दर्शन” या नावाचे विशेष टोलमाफी पास जारी केले जाणार आहेत. या पासवर वाहन क्रमांक, वाहन मालकाचे नाव व इतर आवश्यक माहिती नोंदवली जाईल. प्रवाशांच्या सोयीसाठी हा पास संबंधित प्रादेशिक परिवहन अधिकारी, पोलीस आणि वाहतूक विभागाकडे उपलब्ध राहणार आहे. प्रवासाच्या परतीसाठीही हा पास वैध मानला जाणार आहे.

उपमुख्यमंत्री एकनाथ शिंदे यांनी शासनाच्या आदेशानुसार सर्व ग्रामीण व शहरी पोलीस तसेच प्रादेशिक परिवहन विभागाला प्रवाशांना वेळेत सुविधा उपलब्ध करून देण्याचे निर्देश दिले आहेत. तसेच, या टोलमाफीपास संदर्भातील माहिती सर्वसामान्यांपर्यंत पोहचवण्यासाठी जाहीराती व सूचना प्रसिद्ध करण्याचेही आदेश दिले आहेत.