दोडामार्ग: दोडामार्ग येथे रविवारी दुपारी एक भीषण अपघात घडला. समोरून भरधाव वेगाने येणाऱ्या दुचाकीला वाचवण्याच्या प्रयत्नात एका वॅगनार कारचा चालकाचे वाहनावरील नियंत्रण सुटले आणि कार थेट रस्त्यालगतच्या २० फूट खोल ओहोळात कोसळली. सुदैवाने, या अपघातात चालक थोडक्यात बचावला असून त्याला किरकोळ दुखापती झाल्या आहेत.

मिळालेल्या माहितीनुसार, साटेली-भेडशी येथील एक युवक आपल्या वॅगनार कारने दोडामार्ग शहरातून घरी परतत होता. दरम्यान, ओहोळावळील वळणावर आल्यानंतर त्याला समोरून एक दुचाकी चुकीच्या दिशेने भरधाव वेगाने येताना दिसली.

दुचाकीस्वाराला धडक बसू नये म्हणून चालकाने गाडी वळवली, मात्र तोल जाऊन कार रस्त्याच्या कडेला असलेल्या सुमारे २० फूट खोल ओहोळात कोसळली.

अपघात इतका भीषण होता की कारचे दरवाजे अडकले, मात्र मागचा दरवाजा तुटल्याने चालक त्यातून बाहेर पडू शकला. चालकाला किरकोळ दुखापती झाल्या असून त्याला उपचारासाठी स्थानिक रुग्णालयात हलवण्यात आले.

घटनेनंतर परिसरातील नागरिकांनी तात्काळ घटनास्थळी धाव घेत बचावकार्य सुरू केले. काही नागरिकांनी कार खाली उतरून चालकाला बाहेर काढले. या अपघातात कारचे मोठे नुकसान झाले.

अपघातानंतर काही काळ वाहतूक ठप्प झाली होती. या घटनेमुळे परिसरात मोठी खळबळ उडाली असून नागरिकांनी अशा धोकादायक वळणांवर गाड्या सावकाश चालवाव्या असं आवाहन करण्यात आलं आहे.