मुख्यमंत्री एकनाथ शिंदे (CM Eknath Shinde) यांनी महाराष्ट्रातील शेतकऱ्यांची दिवाळी गोड करणारा निर्णय घेतला आहे. भूविकास बँकेतून (Bhuvikas Bank) कर्ज घेतलेल्या शेतकऱ्यांचे कर्ज माफ करण्यात आले आहे. गुरूवारी (दि.20) झालेल्या मंत्रिमंडळाच्या बैठकीत हा महत्वपूर्ण निर्णय घेण्यात आला आहे. जवळपास 964 कोटी रुपयांची कर्जमाफी करण्यात आली आहे. याशिवाय महाराष्ट्रात वाहनांच्या ऐच्छिक 'स्क्रॅपिंग'साठी धोरणात्मक निर्णय घेण्यात आला आहे.

मुख्यमंत्री एकनाथ शिंदे यांच्या अध्यक्षतेखाली झालेल्या आजच्या मंत्रिमंडळाच्या बैठकीत अनेक महत्वाचे निर्णय घेण्यात आले. भूविकास बँकेचे कर्ज घेतलेल्या शेतकऱ्यांना संपूर्ण कर्जमाफी मिळणार असून जवळपास 964 कोटी रुपयांची कर्जमाफी करण्यात येईल तसेच भू-विकास बँकेच्या मालमत्तांचे शासनाकडे हस्तांतरण करणार असल्याचे मुख्यमंत्री एकनाथ शिंदे यांनी सांगितले. तसेच नीती आयोगाच्या धर्तीवर राज्यात महाराष्ट्र इन्स्टिट्यूशन फॉर ट्रान्सफॉर्मेशन मित्र स्थापन करण्यात येणार आहे.

आजच्या मंत्रिमंडळाच्या बैठकीतील काही महत्वाचे निर्णय

वाहनांच्या ऐच्छिक 'स्क्रॅपिंग'मध्ये स्क्रॅपिंग होत असलेल्या वाहनाचा थकित वाहन करावरील व्याज माफ, पर्यावरण कर आणि त्यावरील व्याजही माफ होणार आहे. आठ वर्षांच्या आत वाहन स्क्रॅप केल्यास वार्षिक कराच्या दहा टक्के सूट तर, 15 वर्षांच्या आत वाहन स्क्रॅप केल्यास वाहनाच्या एकरकमी कराच्या दहा टक्के सूट.

5G सेवांचा अधिक क्षमतेने वापर करण्यासाठी स्वतंत्र धोरणास मान्यता

नीति आयोगाच्या धर्तीवर राज्यात महाराष्ट्र इन्स्टिट्यूशन फॉर ट्रान्सफॉर्मेशन-मित्रा स्थापन करण्याचा निर्णय, विविध विभागातील 149 पदे मित्राकडे वर्ग करणार.