Umesh Kolhe's Family: दिल्ली भाजप नेते कपिल मिश्रा यांनी गुरुवारी दिवंगत केमिस्ट उमेश कोल्हे यांच्या नातेवाईकांची भेट घेऊन त्यांना 30 लाख रुपयांचा धनादेश सुपूर्द केला. कपिल मिश्रा यांनी यापूर्वी उदयपूरमध्ये हत्या झालेल्या कन्हैयालाल यांच्या नातेवाईकांनाही एक कोटीचा धनादेश सुपुर्द केला होता.

दरम्यान, "गेल्या एका वर्षात घडलेल्या घटनांचा" हवाला देत त्यांनी आरोप केला की, अमरावती ही कट्टरतावादी धार्मिक गटांसाठी दहशतवादाची प्रयोगशाळा बनली आहे. ते पुढे म्हणाले, “गेल्या नोव्हेंबरमध्ये रझा अकादमी आणि इतर अल्पसंख्याक संघटनांनी मोर्चा काढला, ज्यामुळे अमरावतीच्या बाजारपेठेत हिंसाचार झाला. त्रिपुरातील एका मशिदीच्या तोडफोडीवरुन अमरावतीत हिसांचार उसळला. परंतु यामध्ये आता निष्पाप लोक त्याची किंमत मोजत आहेत.”

दुसरीकडे, कपिल मिश्रा (Kapil Mishra) यांनी केमिस्ट कोल्हे यांच्या पत्नी, मुलगा आणि भावाची भेट घेऊन त्यांना 30 लाखांचा धनादेश सुपूर्द केला. उमेश कोल्हे यांचा मुलगा संकेत याने सांगितले की, 'कपिल मिश्रा यांनी न्याय मिळवून देण्यासाठी चांगला वकील नेमण्याचे आश्वासन दिले आहे.' 21 जून रोजी रात्री दोन मोटारसायकलस्वारांनी कोल्हे यांची गळा चिरुन हत्या केली.

तसेच, भाजपच्या (BJP) निलंबित प्रवक्त्या नुपूर शर्मा (Nupur Sharma) यांना पाठिंबा दिल्याच्या आरोपावरुन त्यांची हत्या करण्यात आली. नुपूर यांनी प्रेषित मुहम्मद यांच्यावर आक्षेपार्ह टिप्पणी केल्याचा आरोप आहे. 28 जून रोजी उदयपूरमधील (Udaipur) टेलर कन्हैया लाल यांची हत्या करण्याच्या एक आठवड्यापूर्वी ही घटना घडली आहे.