Belagavi border dispute

बेळगाव: सीमाप्रश्न पुन्हा एकदा तापण्याची शक्यता निर्माण झाली आहे. महाराष्ट्र एकीकरण समितीच्या वतीने आयोजित महामेळाव्याला कर्नाटक सरकारने परवानगी नाकारली आहे. तसेच, महाराष्ट्रातून कर्नाटकात येणाऱ्या नेत्यांच्या प्रवेशावर देखील बंदी घातली आहे. यासाठी कोल्हापूर जवळील कोगनोळी येथे महाराष्ट्र आणि कर्नाटक पोलिसांचा मोठा पोलिस बंदोबस्त तौनात करण्यात आला आहे.

कर्नाटक सरकारच्या विधिमंडळ अधिवेशनाविरोधात महाराष्ट्र एकीकरण समितीने (Maharashtra Ekikaran Samiti) बेळगावातील छत्रपती संभाजी महाराज चौक येथे महामेळाव्याचे आयोजन केले आहे. या मेळाव्याला अधिवेशनाचे कारण देत कर्नाटक सरकारने परवानगी नाकारली आहे. तसेच, या मेळाव्यासाठी बेगळगावात येणाऱ्या महाराष्ट्रातील नेत्यांवर देखील बंदी घातली आहे. या पार्श्वभूमीवर कोगनोळी येथे कर्नाटक पोलिसांचा मोठा पोलिस बंदोबस्त पाहायला मिळत आहे.

कर्नाटक सरकारने बेळगावातील पाच ठिकाणी जमावबंदी लागू केल्याची माहिती समोर आली आहे. तसेच, महाराष्ट्र एकीकरण समितीच्या नेत्यांची धरपकड सुरु केल्याचे सांगितले जात आहे. काही नेत्यांना नजरकैदेत देखील ठेवण्यात आले आहे. कर्नाटक सरकार दडपशाही करत असल्याचा आरोप एकीकरण समितीच्या नेत्यांनी केला आहे. महाराष्ट्रातील नेते बेळगावात दाखल होणार नाहीत यासाठी पोलिस विशेष काळजी घेत आहेत.

दरम्यान, महाराष्ट्र एकीकरण समितीच्या महामेळाव्याला कोल्हापूरातून शिवसेना उद्धव ठाकरे गटातील निघालेल्या नेत्यांना कोगनोळी (Koganoli) येथे आडवण्यात आले. महाराष्ट्रातून कर्नाटकात जाणाऱ्या प्रत्येक वाहनाची कसून चौकशी आणि तपासणी केली जात आहे.