कोरोनाच्या (Covid-19) महामारीच्या संकटामुळे 2 वर्षांपासून महाराष्ट्रातील (Maharashtra) सर्वच मंदिरे (Temples) बंद होती. पण आजपासून महाराष्ट्रातील सर्व मंदिरे खुली करण्यात आली आहेत. पुण्यातील प्रसिद्ध असलेलं श्रीमंत दगडूशेठ हलवाई गणपती मंदिर भाविकांसाठी पहाटे 5 वाजता खुले करण्यात आले आहे. भाविकांना दर्शनासाठी रांगा लावल्या आहेत. राज्यमंत्री दत्ता भरणे यांच्या हस्ते श्रीमंत दगडूशेठ हलवाई गणपती मंदिरात आरती करण्यात आली. पण यावेळी कोरोना नियमांचे उल्लंघन बघायला मिळाले.

तसेच एकादशीला देशातून विठ्ठल भक्त आपली वारी पोहचवत असतात. त्या भक्तांना कोरोनामुळे आपली वारी करता आली नाही. आता मंदिर समितीने सर्व भक्तांना दिलासा देत श्री विठ्ठल रुक्मिणी मातेचे मुख दर्शन घेता येणार. दीड वर्षांनंतर श्री विठ्ठल रुक्मिणीचे मंदिर आज उघडले. विठ्ठल रुक्मिणी मंदिराला टस्थापनेच्या निमित्ताने तुळशीच्या पाना फुलांची आरास करण्यात आली आहे. आज पहाटेपासूनच मंदिर परिसरात भाविकांची दर्शन घेण्यासाठी लगबग सुरू झाली आहे.

कोल्हापुरात, प्रसिद्ध महालक्ष्मी मंदिर नवरात्रोत्सवाचा पहिल्या दिवसापासून म्हणजेच आज पासून खुले करण्यात आले आहे. कोरोनामुळे गेले सहा महिने हे मंदिर बंद होते. दर्शनासाठी आजपासून ऑनलाईन बुकिंग सुरु झाली आहे. दर्शनासाठी मंगळवारी 11 वाजता लिंक खुली केली 10 तासातच 30 हजार भाविकांनी दर्शनासाठी नोंदणी केली. महालक्ष्मी मंदिराचे दोन द्वार आज खुले करण्यात आले आहे.

शिर्डीच्या साई बाबांचे भक्त एक वर्षापेक्षा जास्त काळानंतर आजपासून त्यांचे दर्शन घेऊ शकतील. आज पासून शिर्डीचे साई बाबांचे मंदिर खुले करण्यात आले आहे. दर्शन घेण्यासाठी आलेल्या भाविकांचे शिर्डी मंदिराच्या ग्रामस्थांकडून स्वागत करण्यात येत आहे. आज पहाटे काकड आरतीने शिर्डीच्या साई बाबांचे मंदिर दर्शनासाठी खुले झाले आहे. कोट्यवधी भाविकांचे श्रद्धास्थान असलेल्या साईंच्या शिर्डीत आनंदाचे वातावरण निर्माण झाले आहे.