कोल्हापूर : येथील सादळे घाटात आज (रविवार) सायंकाळी मोठा अपघात झाला. त्यात एक ठार 25 जखमी झाल्याची माहिती समोर आहे. हा अपघात ऊसतोड मजुरांच्या ट्रॅक्टरचा झाला असून ज्योतिबाचे दर्शन घेऊन परत जाताना झाला. आज रविवार आणि ज्योतिबाचे खेटे सुरू असल्याने रस्त्याला वर्दळ होती. त्यांमुळे अपघात होताच नागरिकांनी तिकडे धाव घेत मदत कार्य सुरू केले. तसेच याची माहिती पोलिसांना दिली. तर तत्काळ ॲम्बुलन्स बोलवून जखमींना सीपीआर रुग्णालयात दाखल करण्यात आले. (Accident at Kasarwadi - Sadale Ghat near Kolhapur)

याबाबत मिळालेली माहिती अशी की, सांगली जिल्ह्यातील कोरेगाव (ता. वाळवा) येथील यशवंत जाधव हे ज्योतिबाचे दर्शनासाठी आले होते. यावेळी त्यांनी आपल्या सोबत गावातील ऊसतोड कामगारांना हिंदुस्तान ट्रॅक्टरमधून आनले होते. यावेळी सायंकाळी साडेसहा वाजण्याच्या सुमारास कासारवाडी घाटात ट्रॅक्टर जाताना येथील महाविद्यालयाच्या (College) जवळाल मोठ्या वळणावर ट्रॅक्टरचा वेग वाढला. तर ट्रॅक्टरचे पाठीमागील मोठे चाक अक्षरशः निघून पडले. त्यामुळे ट्रॅक्टर व पुढील मजुरांनी भरलेली ट्रॉली कठड्यावरून सुमारे वीस ते पंचवीस फुटांवरून खाली पडली.

या अपघातात (Accident) ट्रॉलीतील नागरिक दगडांवर आदळल्याने जखमी झाले. तर एकाचा मृत्यू झाला असून दोघे अतीगंभीर तर बावीस जण जखमी झाले आहेत. जखमींना (Injured) शहरातील सीपीआर रुग्णालयात (Hospital) दाखल केले असून त्यांच्यावर उपचार केले जात आहेत.