WTC 2023-25 Points Table: भारताने इंग्लंडविरुद्धची 5 कसोटी सामन्यांची मालिका 4-1 अशी जिंकली आहे. हैदराबादमधील पहिली कसोटी हरल्यानंतर रोहित शर्माच्या टीम इंडियाने जबरदस्त पुनरागमन करत पुढचे चार सामने जिंकले. याचाच फायदा आता भारताला वर्ल्ड टेस्ट चॅम्पियनशिपमध्ये झाला आहे. टीम इंडियाने पॉइंट टेबलमध्ये आपले स्थान मजबूत केले आहे. न्यूझीलंड आणि ऑस्ट्रेलिया या प्रतिस्पर्ध्यांवर त्याने मोठी आघाडी मिळवली आहे.

गुणतालिकेत भारत अव्वल स्थानी

दरम्यान, धरमशाला येथे एक डाव आणि 64 धावांनी मिळवलेल्या विजयामुळे टीम इंडियाचे अव्वल स्थान मजबूत झाले आहे. गेल्या आठवड्यात ऑस्ट्रेलियाने न्यूझीलंडवर विजय मिळवल्यानंतर भारत पहिल्या स्थानावर पोहोचला आहे. त्याच्या गुणांची (पीसीटी) टक्केवारी 64.5 होती. आता धरमशाला विजयानंतर ती 68.51 झाली आहे.

सध्याच्या वर्ल्ड टेस्ट चॅम्पियनशिप सायकलमध्ये भारताने 9 पैकी 6 टेस्ट जिंकल्या आहेत. दुसरीकडे, इंग्लंड सातव्या स्थानावरुन आठव्या स्थानावर घसरला आहे. स्लो ओव्हर रेटमुळे आतापर्यंत 19 गुणांचे नुकसान झाले आहे. श्रीलंका दोन सामन्यांतील पराभवासह गुणतालिकेत तळाशी आहे.

न्यूझीलंड दुसऱ्या स्थानी

न्यूझीलंड 5 सामन्यांनंतर 60 पीसीटीसह दुसऱ्या स्थानावर आहे. सध्याच्या चॅम्पियन ऑस्ट्रेलियाने या सायकलमध्ये 11 पैकी 7 सामने जिंकले आहेत. त्याच्या खात्यात 59.06 पीसीटी आहेत. दोन्ही संघांमधील क्राइस्टचर्चमधील दुसऱ्या कसोटीनंतर गुणतालिकेत पुन्हा बदल दिसू शकतो.

दुसरीकडे, इंग्लंडविरुद्धच्या विजयानंतर रोहित शर्माच्या टीम इंडियासमोर आता बांगलादेश आणि न्यूझीलंडचे आव्हान असणार आहे. टीम इंडिया दोन्ही संघांविरुद्ध एकूण 5 कसोटी सामने खेळणार आहे. यावर्षी सप्टेंबर आणि ऑक्टोबरमध्ये त्याचे आयोजन केले जाईल. ऑस्ट्रेलियाविरुद्धच्या बॉर्डर-गावस्कर ट्रॉफीसह भारत सध्याच्या वर्ल्ड टेस्ट चॅम्पियनशिप सायकलचा शेवट करेल.