WPL 2023: महिला प्रीमियर लीगचा पहिला सामना मुंबई इंडियन्स आणि गुजरात जायंट्स यांच्यात सुरु आहे. या सामन्यात मुंबई इंडियन्सची कर्णधार हरमनप्रीत कौरने आपल्या शानदार खेळीच्या जोरावर इतिहास रचला आहे. या सामन्यात तिने 30 चेंडूत 65 धावा केल्या. यादरम्यान तिने आपल्या बॅटने 14 चौकार मारले.

दरम्यान, हरमनप्रीत कौरची ही खेळी पाहून मैदानात बसलेले सगळेच आश्चर्यचकित झाले. हरमनने महिला प्रीमियर लीगमध्ये शानदार पदार्पण केले. तिची ही खेळी वर्षानुवर्षे स्मरणात राहील. हरमनप्रीत कौरने आपल्या खेळीच्या जोरावर या सामन्यात मुंबई संघाला 207 धावांपर्यंत पोहोचवले.

हरमनप्रीत कौरने इतिहास रचला

मुंबई इंडियन्स आणि गुजरात जायंट्स यांच्यात झालेल्या या सामन्यात हरमनप्रीत कौरने (Harmanpreet Kaur) आपल्या खेळीने इतिहास रचला. हरमनप्रीत कौरने या सामन्यात अर्धशतक झळकावताच मोठा विक्रम केला. महिला प्रीमियर लीगमध्ये अर्धशतक ठोकणारी ती पहिली खेळाडू ठरली आहे.

दुसरीकडे, हरमनप्रीत कौरने या सामन्यात 216.67 च्या स्ट्राईक रेटने फलंदाजी केली. या खेळीदरम्यान तिने चौफेर फटकेबाजी केली.

हरमनप्रीत कौर जबरदस्त फॉर्ममध्ये आहे

मुंबई इंडियन्सची कर्णधार हरमनप्रीत कौर जबरदस्त फॉर्ममध्ये आहे. नुकत्याच झालेल्या महिला T20 विश्वचषक स्पर्धेतही ती शानदार फॉर्ममध्ये होती. विश्वचषकाच्या उपांत्य फेरीच्या सामन्यातही तिने ऑस्ट्रेलियाविरुद्ध अर्धशतक झळकावले होते.

तसेच, हरमनप्रीतचा हा फॉर्म मुंबई इंडियन्ससाठी (Mumbai Indians) चांगला संकेत आहे. याचा फायदा संघाला मोसमात होणाऱ्या सामन्यांमध्ये मिळेल. हरमनप्रीत कौरशिवाय मुंबईकडून हेली मॅथ्यूजने 47 आणि अमेलिया कारने 45 धावा केल्या. या खेळीमुळे मुंबई संघाला एवढी मोठी धावसंख्या उभारता आली.