Women's T20 World Cup 2023: दक्षिण आफ्रिकेत सुरू असलेल्या महिला टी20 वर्ल्डकप स्पर्धेत रविवारी (12 फेब्रुवारी) भारतीय महिला संघाचा पहिला सामना पाकिस्तान महिला क्रिकेट संघाशी होणार आहे. या सामन्यातून भारत आणि पाकिस्तान हे दोन्ही संघ आठव्या महिला टी20 वर्ल्डकप मोहिमेची सुरुवात करतील.

दरम्यान, या सामन्यापूर्वी भारताला मोठा धक्का बसला आहे. भारताची उपकर्णधार स्मृती मानधनाला बोटाच्या दुखापत झाली असून त्यातून ती अद्याप सावरलेली नाही. त्यामुळे ती पाकिस्तानविरुद्धच्या सामन्यासाठी उपलब्ध नसेल.

आता अशा परिस्थितीत मानधनाच्या जागेवर सलामीला कोण फलंदाजी करणार हा प्रश्न भारतीय संघासमोर असेल. तरी मानधनाच्या जागेवर सलामीला शफाली वर्माबरोबर जेमिमाह रोड्रिग्जलाच संधी दिली जाण्याची दाट शक्यता आहे.

त्यामुळे मधल्या फळीची जबाबदारी यास्तिका भाटीया, कर्णधार हरमनप्रीत कौर यांच्यासह यष्टीरक्षक ऋचा घोषवर असेल. तसेच त्यांना अष्टपैलू दीप्ती शर्मा आणि देविका वैद्य यांचीही साथ मिळू शकते. दीप्तीवर फलंदाजीबरोबरच गोलंदाजीची मोठी भिस्त असणार आहे.

दीप्ती आणि देविका यांच्याव्यतिरिक्त गोलंदाजी फळीत रेणूका सिंग, राधा यादव, शिखा पांडे, पूजा वस्त्राकार यांना संधी दिली जाऊ शकते. रणूका गेल्यावर्षापासून शानदार फॉर्ममध्ये आहे. तसेच भारतीय संघाला राधा, शिखा आणि पूजा यांच्याकडूनही मोठी अपेक्षा असेल.

(Women's T20 World Cup, India vs Pakistan: India's Predicted Playing XI)

दरम्यान, भारतीय महिला आणि पाकिस्तान महिला यांच्यात आत्तापर्यंत 13 आंतरराष्ट्रीय टी20 सामने खेळवण्यात आले आहेत. यातील 10 सामने भारतीय महिलांनी जिंकले आहेत, तर 3 सामने पाकिस्तानने जिंकले आहेत.

आता या दोन्ही संघातील 14 वा सामना रविवारी केपटाऊनला होणार असून या सामन्याला भारतीय प्रमाणवेळेनुसार संध्याकाळी 6.30 वाजता सुरुवात होणार आहे.

भारतीय महिला संघाची संभावित प्लेइंग इलेव्हन -

जेमिमाह रोड्रिग्ज, शफाली वर्मा, यास्तिका भाटीया, हरमनप्रीत कौर (कर्णधार), ऋचा घोष (यष्टीरक्षक) देविका वैद्य, दीप्ती शर्मा, पूजा वस्त्राकर, रेणुका सिंग, राधा यादव, शिखा पांडे.