West Indies vs Zimbabwe, T20 World Cup 2026: टी-20 वर्ल्ड कप 2026 मधील सुपर 8 चा सामना वेस्ट इंडिज आणि झिम्बाब्वे यांच्यात मुंबईच्या ऐतिहासिक वानखेडे स्टेडियमवर खेळला गेला. हा सामना क्रिकेट चाहत्यांसाठी खऱ्या अर्थाने एक मेजवानी ठरला, कारण मैदानात चौकार आणि षटकारांचा अक्षरशः पाऊस पडला.

वेस्ट इंडिजने (West Indies) झिम्बाब्वेविरुद्ध 107 धावांच्या मोठ्या फरकाने विजय मिळवत उपांत्य फेरीसाठी आपला दावा अधिक मजबूत केला. मात्र या विजयापेक्षाही जास्त चर्चा या सामन्यात प्रस्थापित झालेल्या एका नव्या जागतिक विक्रमाची होत आहे. वेस्ट इंडिज आणि झिम्बाब्वे या दोन्ही संघांनी मिळून टी-20 वर्ल्ड कपच्या इतिहासात यापूर्वी कधीही न घडलेला कारनामा करुन दाखवला असून, 12 वर्षांपूर्वीचा जुना विक्रम मोडीत काढला.

या सामन्यात एकूण 31 षटकार ठोकले गेले, जो टी-20 वर्ल्ड कपच्या इतिहासातील एका सामन्यातील सर्वाधिक षटकारांचा नवा जागतिक विक्रम आहे. यापूर्वी 2014 मध्ये आयर्लंड आणि नेदरलँड्स यांच्यातील सामन्यात 30 षटकार लागले होते. क्रिकेटच्या या महाकुंभात एकाच सामन्यात 30 पेक्षा जास्त षटकार लागण्याची ही पहिलीच वेळ आहे. वानखेडेच्या खेळपट्टीवर वेस्ट इंडिजच्या फलंदाजांनी झिम्बाब्वेच्या गोलंदाजांची अक्षरशः पळता भुई थोडी केली. नाणेफेक जिंकून प्रथम फलंदाजी स्वीकारणाऱ्या वेस्ट इंडिजने 20 षटकांत 6 बाद 254 धावांचा डोंगर उभा केला. हा धावसंख्या या विश्वचषकातील सर्वोच्च आणि टी-20 वर्ल्ड कपच्या इतिहासातील दुसऱ्या क्रमांकाची सर्वोच्च सांघिक धावसंख्या ठरली.

वेस्ट इंडिजच्या फलंदाजांनी त्यांच्या डावात एकूण 19 षटकार लगावले, ज्याद्वारे त्यांनी टी-20 वर्ल्ड कपच्या एका डावात सर्वाधिक षटकार मारण्याच्या विक्रमाची बरोबरी केली. 255 धावांच्या महाप्रचंड आव्हानाचा पाठलाग करताना झिम्बाब्वेचा संघ पूर्णपणे दबावाखाली आला. असे असले तरी, झिम्बाब्वेच्या फलंदाजांनी प्रतिकार करण्याचा प्रयत्न सोडला नाही. ब्रॅड इव्हान्सने अवघ्या 21 चेंडूत 43 धावांची झुंजार खेळी खेळली, ज्यामध्ये 5 उत्तुंग षटकारांचा समावेश होता. झिम्बाब्वेच्या संपूर्ण संघाने मिळून 12 षटकार लगावले. अशाप्रकारे दोन्ही संघांच्या षटकारांची बेरीज 31 वर पोहोचली आणि क्रिकेटच्या पुस्तकात एका सुवर्ण विक्रमाची नोंद झाली.

झिम्बाब्वेचा (Zimbabwe) डाव 17.4 षटकांत 147 धावांवर आटोपला आणि वेस्ट इंडिजने एकतर्फी विजय साकारला. या विजयासह वेस्ट इंडिजने स्पर्धेत सलग 5 विजय मिळवण्याचा पराक्रम केला आहे. कॅरेबियन संघाचा हा फॉर्म पाहता ते जेतेपदाचे प्रबळ दावेदार मानले जात आहेत. आता यापुढील प्रवासात त्यांचा सामना भारत आणि दक्षिण आफ्रिकेसारख्या बलाढ्य संघांशी होणार आहे. या सामन्याने हे सिद्ध केले की, आधुनिक क्रिकेटमध्ये फलंदाजीची ताकद कोणत्या स्तरावर पोहोचली आहे आणि वानखेडेसारखे छोटे मैदान जेव्हा फलंदाजांना साथ देते, तेव्हा गोलंदाजांसाठी बचावाचा कोणताही मार्ग उरत नाही.