CSK CEO on MS Dhoni: चेन्नई सुपर किंग्सचा कर्णधार एमएस धोनी सध्या वेगवेगळ्या कारणांनी सातत्याने चर्चेत येत आहे. तो आयपीएल 2023 हंगामात चेन्नई संघाचे नेतृत्व करताना चांगल्या लयीतही दिसत आहे. पण याच दरम्यान हा त्याचा अखेरचा आयपीएल हंगाम ठरू शकतो अशी चर्चा जोर धरत आहे.

गेल्या अनेक महिन्यांपासून क्रिकेट विश्वात अशी चर्चा होत आहे की धोनीसाठी आयपीएल 2023 हा खेळाडू म्हणून अखेरचा हंगाम असेल. पण याबद्दल अद्याप धोनीने कोणतेही स्पष्ट भाष्य केलेले नाही. त्यामुळे अजूनही तो निवृत्ती घेणार की नाही, याबद्दलचे रहस्य गुलदस्त्यातच आहे.

दरम्यान, चेन्नईने आयपीएल 2023 हंगामातील साखळी फेरीचा घरच्या मैदानावरील अखेरचा सामना खेळल्यानंतर चेन्नई संघाच्या सीईओ कासी विश्वनाथन यांनी धोनीबद्दल मोठी प्रतिक्रिया दिली आहे.

कासी विश्वनाथन म्हणाले, 'आम्हाला विश्वास वाटतो की एमएस धोनी पुढील हंगामातही खेळेल. त्यामुळे आशा आहे चाहते आम्हाला नेहमीप्रमाणेच पाठिंबा देत राहातील.'

धोनी 2008 पासून चेन्नई संघाकडून आयपीएल खेळत आहे. 2008 ला झालेल्या पहिल्या-वहिल्या आयपीएल लिलावातून धोनीला चेन्नईने जवळपास 6 कोटी रुपयांच्या किमतीत खरेदी केले होते. तेव्हापासून चेन्नईने खेळलेल्या प्रत्येक आयपीएल हंगामात धोनी खेळला असून त्याने संघाचे नेतृत्वही केले आहे.

धोनीच्या नेतृत्त्वात चेन्नईने 2010, 2011, 2018 आणि 2021 या चार वर्षी आयपीएलची विजेतीपदेही जिंकली आहेत. तसेच तो आयपीएलमध्ये सर्वाधिक सामने खेळणाराही खेळाडू आहे.

दरम्यान, 41 वर्षीय धोनी आयपीएल 2023 मध्ये चांगल्या लयीत आहे. खालच्या फळीत फलंदाजीला येत त्याने या हंगामात 12 सामन्यांमध्ये 196 च्या सरासरीने 98 धावा केल्या आहेत. यामध्ये त्याच्या 10 षटकारांचा आणि 3 चौकारांचा समावेश आहे.

चाहत्यांसाठी चेन्नईची खास भेट

चेन्नईने एमए चिदंबरम (चेपॉक) स्टेडियमवर 14 मे रोजी कोलकाता नाईट रायडर्स विरुद्ध सामना खेळला, ज्यात चेन्नईला 6 विकेट्सने पराभूत व्हावे लागले. पण हा आयपीएल 2023 स्पर्धीतील चेन्नईचा घरच्या मैदानावरील अखेरचा साखळी सामना असल्याने त्यांनी चाहत्यांना जर्सी आणि टेनिस बॉल भेट दिले.