भारतीय युवा संघाने (अंडर-१९) पुन्हा एकदा आपली ताकद सिद्ध करत विश्वचषकाच्या फायनलमध्ये इंग्लंडचा १०० धावांनी पराभव केला आणि सहाव्यांदा जेतेपदावर शिक्कामोर्तब केले. या ऐतिहासिक विजयानंतर भारतीय ड्रेसिंग रूममध्ये उत्साहाचे वातावरण पाहायला मिळाले. विशेषतः फायनलचा हिरो ठरलेला सलामीवीर फलंदाज वैभव सूर्यवंशी याच्या डान्सचा व्हिडिओ सध्या सोशल मीडियावर तुफान व्हायरल होत आहे.

राजस्थान रॉयल्सने शेअर केलेल्या एका व्हिडिओमध्ये वैभव सूर्यवंशीचा मराठमोळा आणि अस्सल देशी अंदाज पाहायला मिळाला. विजयाचा जल्लोष सुरू असताना वैभव मजेशीर स्वरात म्हणाला, "मित्रांनो, पंजाबी गाणी समजत नाहीत, आता भोजपुरी गाणी वाजणार!" त्यानंतर पवन सिंहच्या प्रसिद्ध 'सॉरी सॉरी कहा तारू' या गाण्यावर त्याने असा काही ठेका धरला की टीममधील इतर खेळाडूही स्वतःला रोखू शकले नाहीत. झिम्बाब्वेच्या भूमीवर विश्वविजेता बनल्यानंतरचा हा 'भोजपुरी तडका' चाहत्यांच्या विशेष पसंतीस उतरत आहे.

फायनलमध्ये वैभवचे वादळ: १७५ धावांची ऐतिहासिक खेळी 

केवळ डान्समध्येच नाही, तर मैदानावरही वैभवने आपल्या बॅटने इंग्लंडच्या गोलंदाजांना नाचवले. त्याने अवघ्या ८० चेंडूंमध्ये १७५ धावांची वादळी खेळी केली. या खेळीत त्याने १५ चौकार आणि १५ उत्तुंग षटकार ठोकले.

वैभवच्या या आक्रमक शतकामुळे भारताने ४११ धावांचा डोंगर उभा केला. त्याला कर्णधार आयुष म्हात्रे (५३ धावा) आणि अभिज्ञान कुंडू (४० धावा) यांनी मोलाची साथ दिली. ४१२ धावांच्या लक्ष्याचा पाठलाग करताना इंग्लंडचा संघ ३११ धावांवर गारद झाला.

सहाव्यांदा विश्वविजेतेपदाला गवसणी 

भारतीय संघाने या संपूर्ण स्पर्धेत एकही सामना न गमावता आपले वर्चस्व राखले. साखळी फेरीपासून ते फायनलपर्यंत भारताचा अश्वमेध कोणीही रोखू शकले नाही.

भारताने यापूर्वी २०००, २००८, २०१२, २०१८ आणि २०२२ मध्ये विश्वचषक जिंकला होता. आता २०२६ मध्ये हे सहावे जेतेपद मिळवून टीम इंडियाने अंडर-१९ क्रिकेटमधील आपला दबदबा पुन्हा एकदा सिद्ध केला आहे.