Usman Tariq Bowling Action Controversy: पाकिस्तानचे क्रिकेटपटू आणि वाद हे समीकरण काही नवीन नाही. सध्या इंग्लंडमध्ये सुरु असलेल्या 'द हंड्रेड 2026' या प्रतिष्ठित टी-20 स्पर्धेत पाकिस्तानचा ऑफ-स्पिनर उस्मान तारिक याच्या संशयास्पद बॉलिंग ॲक्शनवरुन पुन्हा एकदा मोठा गदारोळ माजला. ट्रेंट रॉकेट्स आणि बर्मिंघम फीनिक्स यांच्यात खेळल्या गेलेल्या रोमांचक सामन्यादरम्यान ऑस्ट्रेलियाचा विस्फोटक फलंदाज टिम डेव्हिड याने तारिकच्या चेंडू टाकण्याच्या ॲक्शनवर थेट प्रश्न उपस्थित केले. तारिकच्या चेंडूवर यष्टीरक्षकाकडे झेलबाद झाल्यानंतर डेव्हिड अत्यंत नाराज दिसला आणि त्याने मैदान सोडण्यापूर्वी अंपायरकडे चेंडू 'नो-बॉल' घोषित करण्याची आक्रमक मागणी केली.

अंपायरने आपली मागणी फेटाळून लावल्यानंतर टिम डेव्हिडने सुरुवातीला रिव्ह्यू घेण्याचा विचार केला, मात्र नंतर तो तसाच तंबूत परतला. उस्मान तारिकच्या बॉलिंग ॲक्शनवर प्रश्न उपस्थित होण्याची ही पहिलीच वेळ नाही, तर यापूर्वीही अनेक आंतरराष्ट्रीय आणि देशांतर्गत सामन्यांमध्ये त्याच्या बॉलिंगवर बंदी घालण्याची मागणी झाली. 2024 च्या पाकिस्तान सुपर लीगमध्ये अंपायर आसिफ याकूब आणि रिचर्ड इलिंगवर्थ यांनी तारिकच्या संशयास्पद ॲक्शनची अधिकृत तक्रार मॅच रेफरीकडे केली होती. त्यानंतर 2025 च्या पीएसएल हंगामातही मैदानातील पंचांनी पुन्हा एकदा त्याच्या बॉलिंगवर आक्षेप नोंदवला होता.

विशेष म्हणजे, याच वर्षी ऑस्ट्रेलिया विरुद्ध पाकिस्तान (Pakistan) यांच्यातील दुसऱ्या टी-20 सामन्यादरम्यान ऑस्ट्रेलियन ऑलराउंडर कॅमेरन ग्रीन यानेही उस्मान तारिकच्या ॲक्शनवर आक्षेप घेतला होता. बाद झाल्यानंतर ग्रीनने मैदानावर बेसबॉल फेकल्यासारखा इशारा करत तारिक चेंडू थ्रो करत असल्याचे दर्शवले होते. आता टिम डेव्हिडच्या या ताज्या प्रकरणामुळे उस्मान तारिकच्या बॉलिंग ॲक्शनचा वाद जागतिक क्रिकेटमध्ये पुन्हा एकदा पेटला असून आयसीसी यावर काय कारवाई करणार याकडे सर्वांचे लक्ष लागले आहे.