Taniya Bhatia Sensational Claims: टीम इंडियाची स्टार यष्टिरक्षक फलंदाज तानिया भाटियाने सोमवारी दावा केला की, लंडनमधील मॅरियट हॉटेलमध्ये महिला संघाच्या मुक्कामादरम्यान रोख रक्कम, कार्ड आणि दागिन्यांसह महत्त्वाचे सामान लुटले गेले. भारतीय संघाने नुकत्याच संपलेल्या इंग्लंड दौऱ्यावर प्रथमच एकदिवसीय मालिकेत 3-0 असा शानदार विजय नोंदवला. या मालिकेतील शेवटचा सामना शनिवारी झाला.

तानियाने ट्विटरवर माहिती दिली

तानिया भाटियाने (Tania Bhatia) सोशल मीडियावर दावा केला आहे की, 'लंडनमधील (London) मॅरियट हॉटेलमध्ये महिला संघाच्या मुक्कामादरम्यान मला लुटण्यात आले. वास्तव्यादरम्यान कोणीतरी माझ्या खोलीत आले आणि त्याने रोकड, कार्ड, घड्याळे आणि दागिने असलेली माझी बॅग चोरुन नेली.'

इंग्लंड क्रिकेट बोर्डाकडे चौकशीची मागणी

इंग्लंड आणि वेल्स क्रिकेट बोर्डाच्या (ECB) ट्विटर हँडलला टॅग करत तिने आणखी एका ट्विटमध्ये लिहिले की, 'या प्रकरणाची चौकशी आणि निराकरणाची आशा आहे. ईसीबीच्या पसंतीच्या हॉटेल पार्टनरमध्ये सुरक्षिततेचा अभाव आश्चर्यकारक आहे. ते यासंबंधी दखल घेतील अशी आशा आहे.'

दरम्यान, तानियाच्या तक्रारीवर हॉटेलने आपल्या ट्विटर हँडलवरुन प्रतिक्रिया दिली आहे. ट्विटमध्ये ते म्हणाले की, 'तानिया, आम्हाला हे ऐकून खूप वाईट वाटले. कृपया तुमचे नाव, पत्ता ईमेलद्वारे आम्हाला पाठवा. जेणेकरुन आम्ही त्याची पडताळणी करु शकू.' भारताने 10 ते 24 सप्टेंबर दरम्यान इंग्लंडमध्ये (England) तीन टी-20 आणि अनेक एकदिवसीय सामने खेळले. तानिया भारतीय महिला वनडे संघाचा भाग होती.