Team India New T20 Coach: T20 विश्वचषक 2022 नंतर, वरिष्ठ भारतीय संघ प्रथमच परतला आहे. संघाचे वरिष्ठ खेळाडू बांगलादेशविरुद्धच्या पहिल्या एकदिवसीय सामन्यात खेळताना दिसले, तर प्रशिक्षक राहुल द्रविड देखील त्याच मालिकेतून संघासोबत परतले आहेत. परंतु पहिल्याच सामन्यात बांगलादेशकडून संघाला एका विकेटने पराभव स्वीकारावा लागला. या पराभवादरम्यान टीम इंडियाच्या कॅम्पमधून एक मोठी बातमी समोर येत आहे. मीडिया रिपोर्ट्सनुसार, बीसीसीआय लवकरच संघात मोठे बदल करणार आहे.

T20 संघाला मिळणार नवीन 'BOSS'

भारतीय क्रिकेट नियामक मंडळ (BCCI) T20 सेटअपसाठी वेगळ्या प्रशिक्षकाची नियुक्ती करण्याचा विचार करत आहे, याचा अर्थ मुख्य प्रशिक्षक राहुल द्रविडला T20 संघातून वगळले जाऊ शकते. बोर्डाच्या एका सूत्राने दिलेल्या माहितीनुसार, भारतीय T20 संघासाठी नवीन कोचिंग सेटअप जानेवारीमध्ये घोषित केले जाऊ शकते. त्याचबरोबर टीम इंडियाला (Team India) जानेवारीतच श्रीलंकेविरुद्ध टी-20 मालिका खेळायची आहे. बीसीसीआयच्या एका अधिकाऱ्याने सांगितले की, बोर्ड T20 संघासाठी नवीन प्रशिक्षक नियुक्त करण्यास इच्छुक आहे.

बीसीसीआयच्या अधिकाऱ्याने दिली मोठी माहिती

बीसीसीआयच्या एका अधिकाऱ्याने इनसाइडस्पोर्टला सांगितले की, 'आम्ही यावर गांभीर्याने विचार करत आहोत. राहुल द्रविड किंवा इतर कोणाच्याही क्षमतेबद्दल प्रश्न नाही, परंतु तंतोतंत वेळापत्रक व्यवस्थापित करण्याची गरज आहे.'