IND vs ENG 1st Test: टीम इंडियाचे दिग्गज फलंदाज चेतेश्वर पुजारा आणि अजिंक्य रहाणे गेल्या काही काळापासून भारतीय संघात स्थान मिळवण्यासाठी झगडत आहेत. इंग्लंडविरुद्ध उद्यापासून खेळल्या जाणाऱ्या कसोटी मालिकेत या दोन्ही खेळाडूंची निवड झालेली नाही. या मालिकेतील सुरुवातीच्या सामन्यांमधून विराट कोहली बाहेर असताना या दिग्गजांपैकी एकाचा संघात समावेश होईल, अशी शक्यता वर्तवली जात होती, पण तसे झाले नाही. आता कर्णधार रोहितने असे वक्तव्य केले की, ज्यानंतर या दोन्ही खेळाडूंची कारकीर्द जवळपास संपल्याचे मानले जात आहे.

आता पुजारा-रहाणेच्या करिअरचे काय होणार?

दरम्यान, रोहितने संकते दिले की, चेतेश्वर पुजारा आणि अजिंक्य रहाणे सारख्या दिग्गजांची कसोटी कारकीर्द जवळपास संपली आहे, कारण आता तरुण खेळाडूंना अधिक संधी देण्यावर लक्ष केंद्रित केले आहे. विराट कोहलीने इंग्लंडविरुद्धच्या पहिल्या दोन कसोटी सामन्यांपासून दूर राहण्याच्या निर्णयानंतर पुजारा किंवा रहाणेला संधी दिली जाईल अशी शक्यता होती पण अजित आगरकरच्या अध्यक्षतेखालील निवड समिती मागे वळून पाहण्याच्या मनस्थितीत नाही असे दिसते. कोहलीच्या जागी युवा खेळाडू रजत पाटीदारला संधी देण्यात आली आहे.

रोहितच्या या वक्तव्यामुळे खळबळ उडाली

या निर्णयाबाबत रोहित म्हणाला की, सुरुवातीच्या कसोटीपूर्वी आम्ही सीनियर खेळाडूंना संघात आणण्याचा विचार केला होता पण मग युवा खेळाडूंना संधी कधी मिळणार. याचाही आम्ही विचार केला. मात्र, सीनियर खेळाडूंना बाहेर ठेवण्याचा निर्णय सोपा नव्हता, असेही तो पुढे म्हणाला. रहाणे भारताकडून शेवटचा 2023 मध्ये वेस्ट इंडिजविरुद्ध पोर्ट ऑफ स्पेन येथे खेळला होता, तर पुजाराला गेल्या वर्षी ऑस्ट्रेलियाविरुद्धच्या वर्ल्ड टेस्ट चॅम्पियनशिप फायनलनंतर वगळण्यात आले होते.

रोहित पुढे म्हणाला की, ''सीनियर खेळाडूंना वगळण्याचा निर्णय सोपा नाही. त्यांनी इतक्या धावा केल्या आहेत, इतके सामने जिंकले आणि त्यांच्याकडे इतका अनुभव आहे की त्याकडे दुर्लक्ष करणेही कठीण आहे. पण काही वेळा नवीन खेळाडूंना संधी द्यावी लागते. त्यांना अनुकूल परिस्थितीत संधी दिल्यानंतरच त्यांनी परदेशी भूमीवर खेळायला हवे. तरुणांना संधी देणे महत्त्वाचे आहे, असे मला वाटते.'' मात्र, कोणासाठीही दरवाजे बंद केले नसल्याचेही रोहितने यावेळी नमूद केले. तंदुरुस्त राहून धावा केल्यास कोणालाही संधी मिळू शकते, असेही तो पुढे म्हणाला.