Suryakumar Yadav and Smriti Mandhana: आंतरराष्ट्रीय क्रिकेट परिषदेने गुरुवारी सर्वोत्तम टी20 क्रिकेटपटू 2022 पुरस्कारासाठी नामांकने जाहीर केली आहेत. या पुरस्कारासाठी भारताचा मधल्या फळीतील फलंदाज सूर्यकुमार यादव आणि भारतीय महिला टी20 संघाची उपकर्णधार स्मृती मानधना यांना नामांकने मिळाली आहेत.
आयसीसी सर्वोत्तम टी20 पुरुष क्रिकेटपटू 2022 पुरस्कारासाठी सूर्यकुमारसह सिकंदर रझा, सॅम करन आणि मोहम्मद रिझवान यांनाही नामांकने मिळाली आहे. तसेच आयसीसी सर्वोत्तम टी20 महिला क्रिकेटपटू 2022 पुरस्कारासाठी मानधनासह निदा दार, सोफी डिवाईन आणि ताहलिया मॅकग्रा यांना नामांकन मिळाले आहे.
सूर्यकुमारची वर्षभरात तळपली बॅट
साल 2022 मध्ये सूर्यकुमारने दमदार कामगिरी केली आहे. त्याने या वर्षात 31 आंतरराष्ट्रीय टी20 सामन्यात 46.56 च्या सरासरीने 1164 धावा केल्या आहेत. यामध्ये त्याच्या 2 शतके आणि 9 अर्धशतकांचा समावेश आहे.
तो आंतरराष्ट्रीय टी20 क्रिकेटमध्ये एका वर्षात 1000 पेक्षा अधिक धावा करणारा केवळ दुसरा फलंदाज आहे. यापूर्वी असा विक्रम पाकिस्तानच्या मोहम्मद रिझवान याने केला होता. त्याने 2021 वर्षात 1326 धावा केलेल्या.
याशिवाय सूर्यकुमारने या वर्षात आंतरराष्ट्रीय टी20 मध्ये सर्वाधिक 68 षटकार मारले आहेत. तसेच त्याने यावर्षी झालेल्या टी20 वर्ल्डकपमध्येही तीन अर्धशतके करत भारतासाठी चांगली कामगिरी केली होती.
या स्पर्धेत त्याचा स्टाईकरेट 189 च्या जवळपास होता आणि त्याने जवळपास 60 च्या सरासरीने धावा केल्या. त्याने यावर्षी आयसीसीच्या टी20 क्रमवारीतही फलंदाजांच्या यादीत अव्वल क्रमांक मिळवला आहे.
दरम्यान, त्याने वर्षभरात केलेल्या कामगिरीचे बक्षीस म्हणून त्याला आगामी श्रीलंकेविरुद्धच्या टी20 मालिकेसाठी भारतीय संघाचे उपकर्णधारपदही मिळाले आहे.
मानधनाचीही प्रभावी कामगिरी
मानधनाने यावर्षात 23 आंतरराष्ट्रीय टी20 सामन्यांत 33 च्या सरासरीने 594 धावा केल्या आहेत. यावर्षी तिच्या कामगिरीत सातत्यही राहिले. तिने यावर्षी भारतीय महिला संघाकडून 23 चेंडूत सर्वात जलद टी20 अर्धशतकही झळकावले. त्याचबरोबर आंतरराष्ट्रीय टी20मध्ये 2500 धावांचा टप्पाही पार केला.
तिने राष्ट्रकुल स्पर्धा 2022, आशिया चषक 2022 आणि ऑस्ट्रेलियाविरुद्धच्या टी20 मालिकेत शानदार कामगिरीची नोंद केली. तिने ऑस्ट्रेलियाविरुद्ध डीवाय पाटील स्टेडियमवर झालेल्या दुसऱ्या टी20 सामन्यांत केलेली 49 चेंडूतील 79 धावांच्या खेळी लक्षवेधक ठरली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.