आयपीएल 2022 चा हंगाम सुरु होण्याच्या दोनच दिवस आधीच महेंद्रसिंग धोनीने सर्वांना आश्चर्यचकित केले असून CSK चे कर्णधारपद सोडण्याचा निर्णय घेतला आहे. महेंद्रसिंग धोनीने आगामी इंडियन प्रीमियर लीग (IPL 2022) मध्ये एक किंवा दोन सामने न खेळण्याचा निर्णय घेतल्यास रवींद्र जडेजा (Ravindra Jadeja) चेन्नई सुपर किंग्ज (CSK) संघाचे कर्णधारपद सांभाळू शकेल, असे याआधी भारतीय संघाचे माजी कर्णधार सुनील गावस्कर (Sunil Gavaskar) यांनी म्हटले होते. 2008 मध्ये लीग सुरु झाल्यापासून धोनी सीएसकेचा कर्णधार आहे. विशेष म्हणजे हा त्याचा शेवटचा आयपीएल हंगाम असू शकतो. यापूर्वीच त्याने आंतरराष्ट्रीय क्रिकेटमधून निवृत्ती घेतली आहे. (Sunil Gavaskar says Ravindra Jadeja is ready for captaincy in Csk if ms dhoni takes a rest)

गावस्कर म्हणाले, “रवींद्र जडेजा गेल्या काही वर्षांत एक अष्टपैलू खेळाडू म्हणून समोर आला आहे. सामन्याच्या परिस्थितीनुसार तो आपली रणनिती बदलतो.'' आयपीएलचे अधिकृत प्रसारक असलेल्या स्टार स्पोर्ट्सवर प्रसारित झालेल्या एका कार्यक्रमादरम्यान गावस्कर म्हणाले, “एमएस धोनीने (MS Dhoni) विश्रांती घेण्याचा निर्णय घेतला आणि जडेजाकडे कर्णधारपद सोपवले तर मला आश्चर्य वाटणार नाही.''

तसेच, गतविजेता CSK शनिवारी वानखेडे स्टेडियमवर गतवेळचा उपविजेता असणाऱ्या कोलकाता नाइट रायडर्सविरुद्ध आपल्या मोहिमेची सुरुवात करणार आहे. जेतेपद मिळवण्यासाठी सीएसकेच्या मोहिमेत ऋतुराज गायकवाडची भूमिका महत्त्वाची असेल, असेही गावस्कर म्हणाले.

CSK ने अधिकृत निवेदन प्रसिद्ध केले

संघाने आपल्या अधिकृत निवेदनात लिहिले की, 'महेंद्रसिंग धोनीने निर्णय घेतला आहे की त्याला चेन्नई सुपर किंग्जचे कर्णधारपद सोडायचे आहे. त्याने संघाचा नवा कर्णधार म्हणून रवींद्र जडेजाची निवड केली आहे. जडेजा 2012 पासून संघाचा भाग आहे. तो आमच्या संघाचा तिसरा कर्णधार असेल. महेंद्रसिंग धोनी या सीझनसाठी आणि त्यानंतरही संघाशी जोडला जाईल. IPL 2022 च्या मेगा लिलावात रवींद्र जडेजाला चेन्नईने कायम ठेवले होते. चेन्नईने कायम ठेवलेल्या खेळाडूंमध्ये सर्वात महागडा जडेजा खेळाडू आहे. त्याला चेन्नईने 16 कोटी दिले होते. तर एमएस धोनीला संघाने 12 कोटी रुपयांमध्ये कायम ठेवले आहे.