पणजी ः सामन्याच्या भरपाई वेळेत गोल नोंदवत गतविजेत्या स्पोर्टिंग क्लब द गोवा संघाने जीएफए सुपर लीग फुटबॉल (Football) स्पर्धेत पिछाडीवरून एफसी गोवास 2-2असे गोलबरोबरीत रोखले. म्हापसा येथील धुळेर स्टेडियमवर सोमवारी झालेल्या या लढतीत स्पोर्टिंग क्लब 90 व्या मिनिटापर्यंत दोन गोलने मागे होता.

व्हेलरॉय फर्नांडिसने 24 व्या, तर मलिकजान कलेगर याने 47 व्या मिनिटास केलेल्या प्रत्येकी एका गोलमुळे एफसी गोवा (FC Goa) संघाची स्थिती मजबूत होती. त्यापूर्वी सामन्याच्या आठव्या मिनिटास व्हेलरॉयचा गोल ऑफसाईड ठरला होता. 90 व्या मिनिटास बदली खेळाडू रिची वाझ याने स्पोर्टिंग क्लबची पिछाडी एका गोलने कमी केली. नंतर 90+3व्या मिनिटास स्टेन्डली फर्नांडिसने केलेल्या गोलमुळे स्पोर्टिंगला पराभव टाळता आला व त्यांना एका गुणाची कमाई करता आली.