पणजी: चर्चिल ब्रदर्सने तीन गोलने मागे पडल्यानंतर सामन्याच्या अखेरच्या टप्प्यात झुंजार प्रयत्न केले, पण त्यांना दोनच गोल नोंदवता आले. परिणामी आय-लीग फुटबॉल स्पर्धेत श्रीनिदी डेक्कन एफसीने विजयाचे पूर्ण तीन गुण प्राप्त केले.

(Sreenidi Deccan FC team defeated Churchill Brothers team in I-League football tournament)

बांबोळी येथील ॲथलेटिक स्टेडियमवर आज ( रविवारी ) झालेल्या लढतीत श्रीनिदी डेक्कनने 3-2 फरकाने बाजी मारली. त्यांचा या स्पर्धेतील पहिला विजय ठरला, त्यामुळे त्यांचे दोन लढतीनंतर तीन गुण झाले. चर्चिल ब्रदर्सला सलग दुसऱ्या पराभवाचा सामना करावा लागला. गतआठवड्यात त्यांना बांबोळी येथील राजस्थान युनायटेडने नमविले होते.

श्रीनिदी डेक्कनला 25 व्या मिनिटास आघाडी मिळाली. सोंगपू सिंगसिट याचा फटका चर्चिल ब्रदर्सचा बचावपटू राजू गायकवाड याला चाटून गोलनेटमध्ये गेला. 40 व्या मिनिटास नायजेरियन लुईस ओगाना याने केलेल्या गोलमुळे पाहुणा संघ विश्रांतीला 2-0 असा आघाडीवर होता. नंतर 67 व्या मिनिटास कोलंबियन डेव्हिड मुनोझ याच्या गोलमुळे श्रीनिदी डेक्कनच्या खाती 3-0 अशी भक्कम आघाडी जमा झाली. त्यानंतर चर्चिल ब्रदर्सने आक्रमण तेज केले.

69 व्या मिनिटास रिचर्ड कॉस्ता याने माजी विजेत्यांची पिछाडी एका गोलने कमी केली. 75 व्या मिनिटास बदली खेळाडू लालखॉपुईमाविया याच्या गोलमुळे चर्चिल ब्रदर्सची पिछाडी 2-3 अशी कमी झाली, त्यामुळे त्यांना बरोबरीची संधी दिसू लागली, मात्र पाहुण्या संघाने आघाडी अबाधित राखण्यास यश मिळविले.

पंजाब एफसी विजयी

पंचकुला येथे झालेल्या स्पर्धेतील अन्य एका सामन्यात पंजाब एफसीने मोहम्मेडन स्पोर्टिंगला 1-0 फरकाने हरविले. लुका मासेन याने तिसऱ्याच मिनिटास केलेल्या गोलमुळे पंजाबने स्पर्धेतील सलग दुसरा सामना जिंकला. मोहम्मेडन स्पोर्टिंगला सलग दुसरा पराभव पत्करावा लागला.