Spain Won FIFA Women World Cup 2023:

ऑस्ट्रेलिया आणि न्यूझीलंड येथे फिफा महिला वर्ल्डकप 2023 स्पर्धा पार पडली असून या स्पर्धेचे विजेतेपद स्पेनच्या महिला संघाने जिंकले आहे. रविवारी सिडनीत झालेल्या अंतिम सामन्यात स्पेनने इंग्लंडच्या महिला संघाला 1-0 अशा गोलफरकाने पराभूत करत विश्वविजेतेपद जिंकले.

अंतिम सामन्यात स्पेनकडून ओल्गा कार्मोना हिने पहिल्याच हाफमध्ये सामन्याच्या 29 व्या मिनिटाला गोल केला होता. तिचा हा गोल स्पेनसाठी महत्त्वाचा ठरला. तिच्या या गोलमुळे स्पेनने वर्ल्डकपवर नाव कोरले.

विशेष म्हणजे इंग्लंड आणि स्पेन या दोन्ही संघांनी पहिल्यांदाच फिफा महिला वर्ल्डकप 2023 स्पर्धेच्या अंतिम सामन्यात प्रवेश केला होता. त्यामुळे यंदा या स्पर्धेला नवा विजेता मिळणार हे निश्चित होते.

अंतिम सामन्यात स्पेन आणि इंग्लंड या दोन्ही संघांनी आक्रमक सुरुवात केली होती. पण सुरुवातीला दोन्ही संघांना एकमेकांचा बचाव भेदता येत नव्हता. पण कार्मोनाला 29 व्या मिनिटाला संधी मिळाली आणि तिने डाव्या बाजूने येत गोल नोंदवला. या गोलसह स्पेनने गोलचे खाते उघडले.

यानंतरही दोन्ही संघांचे गोलसाठी प्रयत्न सुरू होते. पहिल्या हाफच्या अखेरीस स्पेनकडून सलमा पॅरालुएलोने गोल करण्याचा प्रयत्न केलेला. मात्र, चेंडू गोलपोस्टला लागला. त्यामुळे ही संधी हुकली. त्यामुळे पहिल्या हाफनंतर स्पेन 1-0 अशा आघाडीवर होते.

दुसऱ्या हाफमध्ये स्पेनने आपली आघाडी कायम ठेवत भक्कम बचाव केला. त्यामुळे इंग्लंडला गोल करता आला नाही. 69 व्या मिनिटालाही स्पेनला पेनल्टीवर दुसरा गोल करण्याची संधी मिळालेली. पण इंग्लंडची गोलकिपर मेरी एरप्सने चांगला बचाव करत हा गोल रोखला. मात्र, इंग्लंडला अखेरीसपर्यंत गोल करता आला नाही. त्यामुळे स्पेनने वर्ल्डकप जिंकला.

स्पेन आणि इंग्लंड यांच्यात यापूर्वी 13 वेळा सामने झाले होते. यात फक्त दोनदाच इंग्लंड पराभूत झाले होते. पण असे असले तरी रविवारी अंतिम सामन्यात मात्र स्पेनचा संघच इंग्लंडला भारी पडला.

विशेष गोष्ट अशी की कार्मोनाने स्पेनसाठी 17 वर्षांखाली आणि 20 वर्षांखालील वर्ल्डकपही जिंकला आहे. आता तिने वरिष्ठ स्तरावरील वर्ल्डकपही जिंकण्याचा कारनामा केला.

दरम्यान, या स्पर्धेत शनिवारी (19 ऑगस्ट) स्विडन आणि ऑस्ट्रेलिया देशांच्या महिला संघात तिसऱ्या क्रमांकासाठी सामना झाला होता. या सामन्यात स्विडनने २-० अशा गोलफरकाने विजय मिळवत तिसरा क्रमांक पटकावला. त्यामुळे यजमान ऑस्ट्रेलिया चौथ्या क्रमांकावर राहिले.

या स्पर्धेत स्विडनला स्पेनविरुद्ध आणि ऑस्ट्रेलियाला इंग्लंडविरुद्ध उपांत्य फेरीत पराभवाचा सामना करावा लागला होता. त्यामुळे हे दोन्ही संघ तिसऱ्या क्रमांकाचा सामना खेळले.