आयपीएल 2022 च्या शेवटच्या साखळी सामन्यात पंजाब किंग्जने सनरायझर्स हैदराबादचा पाच गडी राखून पराभव केला. यासह या स्पर्धेतील दोन्ही संघाचा प्रवास संपुष्टात आला. हे दोन्ही संघ आधीच प्लेऑफच्या शर्यतीतून बाहेर पडले होते. त्यामुळे या सामन्याला विशेष महत्त्व नव्हते, परंतु पंजाब किंग्जचा सलामीवीर शिखर धवनने महत्त्वपूर्ण कामगिरी केली आहे. या सामन्यात धवनने आयपीएलमधील 700 चौकार पूर्ण केले. अशी कामगिरी करणारा तो पहिला फलंदाज ठरला आहे. (Shikhar Dhawan has become the first batsman to hit 700 fours in the IPL)

दरम्यान, आयपीएलमध्ये (IPL) सर्वाधिक चौकार मारण्याच्या बाबतीत धवनच्या खालोखाल विराट कोहली आहे, ज्याने 576 चौकार मारले आहेत. त्याचबरोबर या यादीत डेव्हिड वॉर्नर (David Warner) तिसऱ्या क्रमांकावर आहे. त्याने 561 चौकार मारले आहेत.

हैदराबादविरुद्ध 39 धावा

धवनने सनरायझर्स हैदराबादविरुद्ध (Sunrisers Hyderabad) 32 चेंडूत 39 धावांची महत्त्वपूर्ण खेळी खेळली. यादरम्यान त्याच्या बॅटमधून दोन षटकार आणि दोन चौकार आले. शिखर धवनने आपल्या डावातील पहिले चार चौकार मारताच एक खास विक्रम केला. आयपीएलमध्ये 700 चौकार मारणारा तो पहिला फलंदाज ठरला. धवनने 206 सामन्यांच्या 205 डावांमध्ये 35.08 च्या सरासरीने 6244 धावा केल्या आहेत. या लीगमध्ये त्याचा स्ट्राईक रेट 126.35 आहे. त्याच्या नावावर दोन शतके आणि 47 अर्धशतके आहेत. दरम्यान, त्याच्या बॅटने 701 चौकार आणि 136 षटकार मारले आहेत.

आयपीएलमध्ये सर्वाधिक धावा करण्याच्या बाबतीत धवन दुसऱ्या क्रमांकावर

आयपीएलमध्ये सर्वाधिक धावा करण्याच्या बाबतीत शिखर धवन विराट कोहलीनंतर दुसऱ्या क्रमांकावर आहे. विराटने 6592 धावा केल्या आहेत, तर धवनने 6244 धावा केल्या आहेत. या दोघांशिवाय तिसऱ्या कोणत्याही फलंदाजाने आयपीएलमध्ये 6000 धावांचा टप्पा गाठलेला नाही. मात्र, रोहित शर्मा आणि डेव्हिड वॉर्नर पुढील हंगामात आयपीएलमध्ये 6000 धावा पूर्ण करु शकतात.