पणजी: रंगतदार लढतीत वेळसाव स्पोर्टस अँड कल्चरल क्लबला 4-2 फरकाने नमवून सेझा फुटबॉल अकादमीने (Seza Academy) 17 व्या गोवा पोलिस कप फुटबॉल (Goa Police Cup Football) स्पर्धेच्या उपांत्यपूर्व फेरीत प्रवेश केला. सामना रविवारी म्हापसा येथील धुळेर स्टेडियमवर झाला.

सामन्याचा पूर्वार्ध अटीतटीचा ठरला. या कालावधीत सेझा अकादमी संघ ३-२ फरकाने आघाडीवर होता. ॲश्ली कार्दोझ याने दोन गोल केले. त्याने अनुक्रमे ९ व ३०व्या मिनिटास गोल नोंदवून सेझा अकादमीस 2-0 आघाडी मिळवून दिली. नंतर जेम्स फर्नांडिसने दोन मिनिटांत दोन गोल केल्यामुळे वेळसाव क्लबने 2-2 अशी गोलबरोबरी साधली. जेम्सने अनुक्रमे 36 व 38 व्या मिनिटास गोल नोंदविला. विश्रांतीपूर्व आकाश कुडणेकर याने सेझा अकादमीस पुन्हा 3-2 अशी आघाडी मिळवून दिली. सामन्याच्या 55 व्या मिनिटास फहीझ महंमद याने गोल केल्यामुळे सेझा अकादमीची आघाडी 4-2 अशी भक्कम झाली. स्पर्धेत सोमवारी सेंट अँथनी स्पोर्टस क्लब व पणजी फुटबॉलर्स यांच्यात लढत होईल.