Rishabh Pant: बांगलादेश विरुद्ध भारत यांच्यात बुधवारपासून दोन सामन्यांच्या कसोटी मालिकेला सुरुवात होणार आहे. या मालिकेसाठी यष्टीरक्षक ऋषभ पंतही भारतीय संघात सामील झाला असून त्याने सरावालाही जोरदार सुरुवात केली आहे.

तो या कसोटी मालिकेपूर्वी बांगलादेशविरुद्धच झालेल्या वनडे मालिकेत खेळला नव्हता. त्याच्या न खेळण्यामागचे कारण बीसीसीआयने स्पष्ट केले नव्हते, पण यामागे दुखापत असण्याचा कयास अनेकांनी लावला होता.

पण, आता कसोटी मालिकेसाठी पंतने भारतीय संघात पुनरागमन केले आहे. तसेच तो कसोटी सामन्याच्या तयारीलाही लागला आहे. त्याचा नेटमध्ये सराव करतानाचा व्हिडिओ सध्या व्हायरल होत आहे. या व्हिडिओमध्ये तो मोठमोठे शॉट्स खेळताना दिसत आहे.

दरम्यान, पंतची मर्यादीत षटकांच्या क्रिकेटमधील लय चिंताजनक असली, तरी त्याची कसोटी क्रिकेटमधील कामगिरी आत्तापर्यंत चांगली राहिली आहे. त्यामुळे आगामी कसोटीतही त्याच्याकडून भारतीय संघाला चांगल्या कामगिरीचीच अपेक्षा असेल.

त्याचबरोबर पंतचे जरी भारतीय संघात पुनरागमन झाले असले, तरी भारतीय संघाला अन्य खेळाडूंच्या दुखापतीचा फटका बसला आहे. भारताचा नियमित कर्णधार रोहित शर्माच्या हाताच्या अंगठ्याला दुखापत झाली आहे. त्यामुळे बांगलादेशविरुद्धच्या पहिल्या कसोटी सामन्यातून तो बाहेर झाला आहे.

तसेच मोहम्मद शमी आणि रविंद्र जडेजाही दुखापतींमुळे बांगलादेशविरुद्धच्या कसोटी मालिकेतूनच बाहेर झाले आहेत. त्यामुळे बीसीसीआयने दुखापतग्रस्त खेळाडूंच्या जागेवर या कसोटी मालिकेसाठी अभिमन्यू ईश्वरन, सौरभ कुमार, नवदीप सैनी आणि जयदेव उनाडकट यांचा भारतीय संघात समावेश केला आहे.

बांगलादेश विरुद्ध भारत यांच्यातील पहिला कसोटी सामना 14 ते 18 डिसेंबरदरम्यान चट्टोग्राम येथे होणार आहे. त्यानंतर 22 ते 26 डिसेंबरदरम्यान ढाका येथे दुसरा कसोटी सामना होणार आहे. ही कसोटी मालिका आयसीसी जागतिक कसोटी अजिंक्यपद 2021-23 स्पर्धेचा भाग आहे.