Sandeep Sharma’s daughter watches him play in against CSK: इंडियन प्रीमियर लीग 2023 स्पर्धेत बुधवारी (12 एप्रिल) चेन्नई सुपर किंग्स विरुद्ध राजस्थान रॉयल्स संघात सामना पार पडला. एमए चिदंबरम स्टेडियमवर झालेल्या या सामन्यात राजस्थानने केवळ 3 धावांनी विजय मिळवला. या सामन्यात राजस्थानचा वेगवान गोलंदाज संदीप शर्माची कामगिरीही महत्त्वाची ठरली.

दरम्यान, तो हा सामना खेळत असताना त्याची 8 महिन्यांची मुलगी सोहानी त्याला टीव्हीवर पाहात असतानाचा एक गोड व्हिडिओ सध्या व्हायरल झाला आहे. संदीपची पत्नी ताशा शर्मा हिने इंस्टाग्रामवर हा व्हिडिओ शेअर केला होता. त्या व्हिडिओला तिने कॅप्शन दिले होते की 'जेव्हा ती तिच्या बाबाला टीव्हीवर पाहाते. डॅडीज गर्ल.'

या व्हिडिओमध्ये दिसते की आईच्या मांडीवर बसलेली सोहानी टीव्हीमध्ये दिसणाऱ्या तिच्या बाबाकडे पाहून हसत आहे.

संदीप शर्माने या सामन्यात सीएसकेचा युवा सलामीवीर ऋतुराज गायकवाडची विकेट घेतली होती. तसेच त्याने अखेरच्या षटकात सीएसकेला 21 धावांची गरज असताना आणि सीएसकेकडून एमएस धोनी व रविंद्र जडेजा फलंदाजी करत असताना गोलंदाजी केली होती.

त्याने पहिल्या तीन चेंडूंतच 14 धावा खर्च केल्यानंतर अखेरच्या तीन चेंडूंवर शानदार गोलंदाजी करत धोनी आणि जडेजा यांना मोठा फटका मारण्यापासून रोखले होते. त्यामुळे राजस्थानला या सामन्यात विजय मिळवता आला.

दरम्यान, संदीप शर्मा आयपीएल 2023 लिलावावेळी अनसोल्ड राहिला होता. त्याला कोणीही खरेदी केले नव्हते. मात्र, स्पर्धेच्या आधी राजस्थान रॉयल्सचा गोलंदाज प्रसिद्ध कृष्णा दुखापतग्रस्त झाल्याने त्याचा बदली खेळाडू म्हणून संदीप शर्माला राजस्थानने संघात सामील करून घेतले.

संदीपने 2013 साली आयपीएलमध्ये पदार्पण केले असून त्याने पंजाब किंग्स, सनरायझर्स हैदराबाद आणि आता राजस्थान रॉयल्स संघाकडून सामने खेळले आहेत. त्याने आत्तापर्यत 106 आयपीएल सामने खेळले असून 26.31 च्या सरासरीने 116 विकेट्स घेतल्या आहेत.