माजी कर्णधार आणि अनुभवी फलंदाज असणाऱ्या राहुल द्रविडची (Rahul Dravid) टीम इंडियाच्या (Team India) मुख्य प्रशिक्षकपदी निवड करण्यात आली आहे. बुधवारी क्रिकेट सल्लागार समितीने राहुल द्रविडची मुख्य प्रशिक्षकपदी एकमताने निवड केली. T20 विश्वचषकानंतर राहुल द्रविड मुख्य प्रशिक्षकपदाची जबाबदारी स्वीकारणार आहे. T20 विश्वचषकानंतर रवी शास्त्री (Ravi Shastri) यांचा कार्यकाळ संपणार असून आता द्रविडच्या मार्गदर्शनाखाली संघ पुढे जाणार आहे. राहुल द्रविड भारत-न्यूझीलंड मालिकेपासून प्रशिक्षकपदाची सुरुवात करणार आहे.

टीम इंडियाचे मुख्य प्रशिक्षक बनल्यानंतर राहुल द्रविडने सांगितले की, 'हे पद मिळणे हा माझ्यासाठी सन्मानजनक आहे. तसेच या भूमिकेसाठी मी तयार आहे.'

द्रविड पुढे म्हणाला, 'टीम इंडियाचे मुख्य प्रशिक्षकपद मिळणे माझ्यासाठी सन्मानाची गोष्ट असून मी ही जबाबदारी घेण्यास तयार आहे. रवी शास्त्रींच्या नेतृत्वाखाली टीम इंडियाने चांगली कामगिरी केली असून मी संघाला पुढे नेण्याची आशा करतो. मी NCA, U-19 आणि India A मधील बहुतेक खेळाडूंसोबत काम केले आहे. मला माहित आहे की, सर्व खेळाडूंमध्ये उत्कटता आहे आणि त्यांना दररोज स्वत: ला सुधारायचे आहे. पुढील दोन वर्षांत अनेक मोठ्या स्पर्धा येत असून त्या स्पर्धांमध्ये चांगली कामगिरी करण्याचे आमचे ध्येय असणार आहे.