Punjab Kings Clarify on Shashank Singh buy in IPL 2024 Auction:

इंडियन प्रीमियर लीग 2024 स्पर्धेसाठी मंगळवारी (19 डिसेंबर) दुबईत खेळाडूंचा लिलाव झाला. या लिलावात पंजाब किंग्सने खरेदी केलेल्या शशांक सिंग या खेळाडूमुळे बरीत चर्चा झाली. या लिलावात शशांक सिंग या नावामुळे पंजाब किंग्सचा मोठा गोंधळ झाल्याचे दिसले.

या लिलावात शशांक सिंग या नावाचे दोन खेळाडू होते. त्यामुळे पंजाब किंग्सने ज्या खेळाडूला घेतले, तो त्यांना घ्यायचा नव्हता. याबद्दल त्यांनी चर्चा करण्याचाही लिलावादरम्यान प्रयत्नही केला.

मात्र, लिलाव घेणाऱ्या मलिका सागर यांनी एकदा खेळाडू विकला गेल्यानंतर बदल होणार नसल्याचे सांगितले. या घटनेमुळे प्रचंड चर्चा झाली होती. यावर आता पंजाब किंग्सने अधिकृत प्रतिक्रिया दिली आहे.

पंजाब किंग्सने सांगितले आहे की त्यांनी जो खेळाडू घेतला, तो नेहमीच त्यांच्या निशाण्यावर होता. त्यांनी पोस्ट करत लिहिले की 'दोन खेळाडूंची नावे सारखीच असल्याने गोंधळ झाला होता. आम्ही शशांकला संघात घेतल्याने आनंदी आहोत आणि तो आपमच्या संघाच्या यशात योगदान देईल अशा आशा आहे.'

दरम्यान, पंजाब किंग्सने खरेदी केलेला शशांक 32 वर्षांचा अष्टपैलू खेळाडू आहे. तो छत्तीसगढकडून खेळतो. तसेच यापूर्वी सनरायझर्स हैदराबाद संघात होता. तसेच दुसरा जो शशांक सिंग होता, तो 19 वर्षांचा असून या लिलावात अनसोल्ड राहिला.

पंजाब किंग्सच्या स्पष्टीकरणाच्या पोस्टवर 31 वर्षीय शशांकनेही उत्तर दिले आहे. त्याने लिहिले की 'सर्व ठिक आहे. माझ्यावर विश्वास ठेवण्याबद्दल धन्यवाद.'

नक्की झालं काय?

19 वर्षीय बंगालच्या शशांक सिंगचे नाव लिलावात साधारण रात्री 8 वाजताच्या सुमारास पुकारले गेले. त्यावेळी कोणीही बोली लावली नाही. त्यानंतर लगेचच 31 वर्षीय शशांकचे नाव पुकारण्यात आले, ज्यावर फक्त पंजाब किंग्सने 20 लाखांची बोली लावली.

पण त्यानंतर पंजाब किंग्सच्या टेबलवर काही चर्चा झाली आणि पंजाब किंग्सची सहसंघमालकिन प्रीती झिंटा आणि नेस वाडिया यांननकार देणारे काही हावभाव केले. त्यावेळी मल्लिका सागर यांनी विचारले की तुम्हाला खेळाडू नको आहे? त्यावर वाडिया यांनी नाही असे म्हटले. मात्र नंतर मल्लिका सागर यांनी हा निर्णय मागे घेता येणार नसल्याचे सांगितले.