पॅक्स ऑफ नागोवा संघाने गुरुवारी प्रोफेशनल लीग फुटबॉल स्पर्धेत सलग दुसऱ्या विजयाची नोंद केली. त्यांनी कुठ्ठाळी व्हिलेजर्सवर 1-0 फरकाने निसटती मात केली.

सामना म्हापसा येथील धुळेर स्टेडियमवर झाला. सामन्यातील निर्णायक ठरलेला गोल रॉयल ऑलिव्हेरा याने सामन्याच्या सहाव्या मिनिटास नोंदविला.

जेस्लॉय मोनिझ याच्या शानदार पासवर त्याने कुठ्ठाळी व्हिलेजर्सच्या गोलरक्षकाला पूर्णपणे चकवा दिला. रॉयल सामन्याचा मानकरी ठरला.

स्पर्धेतील अगोदरच्या लढतीत वास्को स्पोर्टस क्लबला पराजित केलेल्या पॅक्स ऑफ नागोवाचे आता तीन लढतीनंतर दोन विजय व एक पराभव अशा कामगिरीसह त्यांचे सहा गुण झाले आहेत. कुठ्ठाळी व्हिलेजर्सला ओळीने तिसरा पराभव पत्करावा लागला.