FIFA World Cup 2022: फुटबॉलच्या वर्ल्डकप स्पर्धेला 20 नोव्हेंबरपासून कतारमध्ये सुरवात होत आहे. वेगवेगळे संघ कतारमध्ये दाखल होत आहेत. पण या सर्वात सध्या सर्वात लक्षवेधी ठरला आहे तो पोलंडचा संघ. कारअण पोलंडच्या संघाला चक्क F16 लढाऊ विमानांच्या घेऱ्यामध्ये कतारमध्ये दाखल व्हावे लागले आहे. (Russia-Ukraine War)

रशिया-युक्रेन युद्धाचा परिणाम या दोन्ही देशांच्या शेजारी राष्ट्रांवर मोठ्या प्रमाणात पडलेला आहे. रशियाने नुकताच युक्रेनवर मोठा क्षेपणास्त्र हल्ला चढवला. त्यामुळे युक्रेनमधील बराचसा भाग अंधारात बुडाला आहे. या दोन्ही देशातील तणाव सध्या सर्वोच्च पातळीवर पोहचला आहे. या युद्धाची मोठी झळ रशिया आणि युक्रेन या दोन्ही देशांच्या शेजारील राष्ट्रांनाही बसत आहे.

पोलंड हा असा देश आहे, ज्याची सीमा रशिया आणि युक्रेन या दोन्ही देशांना लागून आहे. नुकतेच पोलंड-युक्रेन सीमेवर क्षेपणास्त्र हल्ल्यात दोघांचा मृत्यू झाला होता. त्यामुळे तिथे तणाव निर्माण झाला होता. त्यामुळेच विश्वचषक स्पर्धेत दाखल होण्यासाठी पोलंडचा संघ जेव्हा विमानाने कतारला निघाला, तेव्हा शेजारील युद्धग्रस्त देशातील तणाव पाहून या विमानाला सुरक्षा प्रदान करण्यात आली होती. त्यामुळे पोलंडच्या टीमच्या या विमानाला चक्क F 16 या लढाऊ विमानांच्या संरक्षणात कतारमध्ये दाखल व्हावे लागले.

पोलंडच्या हवाई सीमेबाहेर जाईपर्यंत ही F 16 या लढाऊ विमाने पोलंडच्या टीमच्या विमानासोबत होती. पोलंड नॅशनल फुटबॉल टीमच्या अधिकृत ट्विटर अकाऊंटवरून ही माहिती दिली गेली आहे, त्याचा एक व्हिडिओदेखील शेअर करण्यात आला आहे. त्यांनी कॅप्शनमध्ये म्हटले आहे की, 'आम्हाला F16 विमानांच्या घेऱ्यात पोलंडच्या दक्षिण सीमेपर्यंत पोहचवले गेले. वैमानिकांना धन्यवाद आणि शुभेच्छा!'

दरम्यान, पोलंड ग्रुप सी मध्ये असून त्यांचा पहिला सामना 22 नोव्हेंबर रोजी मेक्सिको विरूद्ध होणार आहे.