पणजीः टोकियो ऑलिंपिक बॅडमिंटनमधील महिला एकेरीतील पी. व्ही. सिंधू हिच्या उपांत्य सामन्याचे थेट प्रक्षेपण, तसेच ऑलिंपिक जागृती कार्यक्रमांतर्गत (Olympics Awareness Programme) बॅडमिंटनसाठी योगदान दिलेल्यांचा सत्कार या कारणास्तव मिरामार येथील क्लब टेनिस द गास्पार डायस संकुलास शनिवारी बॅडमिंटन महोत्सवाचे स्वरूप प्राप्त झाले होते. सिंधू आणि तई झू-यिंग यांच्यातील यांच्यातील सामन्याचे गोवा बॅडमिंटन असोसिएशनतर्फे (Goa Badminton Association) थेट प्रक्षेपण करण्यात आले. सुमारे साठ मुलं आणि त्यांच्या पालकांनी या सामन्याचा आनंद लुटला. त्यानंतर गोवा ऑलिंपिक असोसिएशनतर्फे लुसियान सुवारिस, सर्फराज शेख, यशवंतराव देसाई, अनिकेत शेणई, मरिना आल्बुकर्क यांनी राज्य बॅडमिंटनमध्ये दिलेल्या योगदानाची दखल घेत त्यांचा सत्कार करण्यात आला. यावेळी भारताची आंतरराष्ट्रीय बॅडमिंटनपटू अनुरा प्रभुदेसाई, गोवा बॅडमिंटन संघटनेचे अध्यक्ष नरहर ठाकूर, सचिव संदीप हेबळे, कार्यक्रम समन्वयक चेतन कवळेकर यांची उपस्थिती होती.

फोंडा येथे दौड

ऑलिंपिक जागृतीनिमित्त फोंडा येथे शनिवारी तायक्वांडो असोसिएशन ऑफ गोवा, ज्युडो असोसिएशन, फोंडा जिम्नॅस्टिक्स यांनी गोवा ऑलिंपिक असोसिएशन व फोंडा पोलिस यांच्या सहकार्याने दौड आयोजित केली. पोलिस अधिकारी मोहन गावडे यांनी दौडीस हिरवा बावटा दाखविला. यावेळी गोवा ऑलिंपिक संघटनेचे उपाध्यक्ष ॲड. आर. डी. मंगेशकर, सुनील शर्मा, शिवकरण केवत, जयवंत हम्मणावर, दीपक मांद्रेकर यांची उपस्थिती होती.