Novak Djokovic reacted on Virat Kohli's 50th ODI Century:
वनडे वर्ल्डकप 2023 स्पर्धेच्या अंतिम सामन्यात भारतीय क्रिकेट संघाने दणक्यात प्रवेश मिळवला आहे. बुधवारी वानखेडे स्टेडियमवर या स्पर्धेतील पहिला उपांत्य सामना भारत आणि न्यूझीलंड संघात रंगला. या सामन्यात भारताने 70 धावांनी विजय मिळवला.
भारताच्या या विजयात स्टार फलंदाज विराट कोहलीचेही मोठे योगदान राहिले. त्यामुळे त्याचे या सामन्यादरम्यान मोठ्या प्रमाणात कौतुकही झाले. सार्बियाचा स्टार टेनिसपटू नोवाक जोकोविचनेही विराटचे कौतुक केले आहे.
विराटने या सामन्यात 113 चेंडूत 117 धावांची खेळी केली. या खेळीत त्याने 9 चौकार आणि 2 षटकार मारले. विराट कोहलीच्या वनडे कारकिर्दीतील हे 50 वे शतक होते. त्यामुळे तो वनडेत 50 शतके ठोकणारा पहिलाच क्रिकेटपटू ठरला. यापूर्वी कोणालाही वनडेत 50 शतके करता आली नव्हती.
विराटने 50 वे वनडे शतक करताना मास्टर-ब्लास्टर सचिन तेंडुलकरचा 49 शतकांचा विक्रम मोडला. याबद्दल त्याच्यावर सध्या स्तुतीसुमने उधळली जात आहेत.
सर्वाधिक 24 ग्रँडस्लॅम जिंकणाऱ्या जोकोविचने बीसीसीआयने विराटच्या 50 शतकाबद्दल केलेले ट्वीट रिट्वीट करत त्यावर लिहिले की 'अभिनंदन विराट कोहली. दिग्गज.'
जोकोविचच्या या ट्वीटवर अनेक युजर्सकडून प्रतिक्रिया येत आहेत. त्यातीन अनेकांनी म्हटले आहे की 'एका दिग्गजाकडून दुसऱ्या दिग्गजाचे कौतुक होत आहे'.
बुधवारी उपांत्य सामन्यादरम्यान वानखेडे स्टेडियमवर इंग्लंडचा दिग्गज फुटबॉलपटू डेव्हिड बेकहॅम देखील उपस्थित होता. त्यामुळे त्यालाही विराटच्या 50व्या वनडे शतकाचा साक्षीदार होता आहे. त्यानेही विराटचे त्याच्या पराक्रमाबद्दल कौतुक केले.
सामन्याबद्दल सांगायचे झाले, तर भारताकडून विराट व्यतिरिक्त श्रेयस अय्यरने 105 धावांची शतकी खेळी केली. तसेच शुभमन गिलने नाबाद 80 धावा केल्या, तर कर्णधार रोहित शर्माने 47 धावांची खेळी केली. त्यामुळे भारताला 50 षटकात 4 बाद 397 धावा करता आल्या. न्यूझीलंडकडून टीम साऊदीने 3 विकेट्स घेतल्या, तर ट्रेंट बोल्टने 1 विकेट घेतली.
त्यानंतर न्यूझीलंडचा 398 धावांच्या आव्हानाचा पाठलाग करताना 48.5 षटकात सर्वबाद 327 धावा करता आल्या. न्यूझीलंडकडून डॅरिल मिचेलने 134 धावांची शानदार खेळी केली. तसेच केन विलियम्सनने 69 धावांची खेळी केली, तर ग्लेन फिलिप्सने 41 धावांची खेळी केली. मात्र, त्यांना न्यूझीलंडला विजय मिळवून देता आला नाही.
भारताकडून मोहम्मद शमीने सर्वाधिक 7 विकेट्स घेतल्या. तसेच जसप्रीत बुमराह, मोहम्मद सिराज आणि कुलदीप यादव यांना प्रत्येकी 1 विकेट घेता आली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.