क्रिकेटप्रेमींसाठी एक मोठी बातमी समोर आली आहे. भारतात आता जगातील सर्वात उंच क्रिकेट स्टेडियम उभारण्याची तयारी सुरू झाली आहे. हे अत्यंत अनोखे क्रिकेट मैदान केंद्रशासित प्रदेश लडाखमध्ये समुद्रसपाटीपासून तब्बल 11,800 फूट उंचीवर उभारण्याचा प्रस्ताव आहे. त्यामुळे भारताच्या क्रिकेटविश्वात आणखी एका वैशिष्ट्यपूर्ण स्टेडियमची भर पडणार आहे.

लेहजवळ थिक्से परिसरात उभारण्याची योजना

मिळालेल्या माहितीनुसार, लडाखमधील लेहजवळील थिक्से परिसरात या क्रिकेट स्टेडियमची उभारणी करण्याची योजना आखण्यात आली आहे. या प्रकल्पासाठी सुमारे 100 कोटी रुपयांचा खर्च अपेक्षित असल्याचे सांगितले जात आहे. प्रस्तावित स्टेडियमला ‘रणबीरपूर क्रिकेट स्टेडियम’ असे नाव दिले जाण्याची शक्यता असल्याची माहिती समोर आली आहे.

लडाख प्रशासनाकडून या भागातील क्रीडा सुविधांचा विकास करण्यावर भर दिला जात आहे. विशेषतः स्थानिक युवा क्रिकेटपटूंना सरावासाठी दर्जेदार मैदान उपलब्ध करून देणे आणि देशांतर्गत क्रिकेटसाठी आवश्यक पायाभूत सुविधा निर्माण करणे हा या प्रकल्पामागील प्रमुख उद्देश असल्याचे मानले जात आहे.

उंचीमुळे मैदान ठरणार खास

समुद्रसपाटीपासून तब्बल 11,800 फूट उंचीवर क्रिकेटचे मैदान उभारणे हीच या प्रकल्पाची सर्वात मोठी खासियत आहे. सध्या हिमाचल प्रदेशातील धर्मशाला क्रिकेट स्टेडियम सुमारे 4,000 फूट उंचीवर असून, लद्दाखमधील प्रस्तावित मैदान त्यापेक्षा खूपच अधिक उंचीवर असेल.

मात्र लडाखचे भौगोलिक वातावरण आणि अत्यंत थंड हवामान पाहता येथे क्रिकेटचे सामने आयोजित करणे मोठे आव्हान ठरू शकते. त्यामुळे हवामान अनुकूल असलेल्या उन्हाळ्याच्या कालावधीतच मोठ्या सामन्यांचे आयोजन करण्यावर भर दिला जाऊ शकतो.

क्रिकेटसोबत पर्यटनालाही मिळणार फायदा

लडाख हे आधीपासूनच भारतातील प्रमुख पर्यटनस्थळांपैकी एक आहे. पर्वतरांगा, निसर्गरम्य परिसर आणि साहसी पर्यटनासाठी देश-विदेशातील पर्यटक येथे मोठ्या संख्येने येतात. अशा परिस्थितीत जगातील सर्वात उंच क्रिकेट स्टेडियम ही लद्दाखची आणखी एक ओळख बनू शकते.

धर्मशाला क्रिकेट स्टेडियममुळे हिमाचल प्रदेशातील पर्यटनाला मोठी प्रसिद्धी मिळाली आहे. त्याच धर्तीवर लडाखमध्ये क्रिकेटचे आंतरराष्ट्रीय दर्जाचे मैदान उभे राहिल्यास क्रिकेट पाहण्यासाठी तसेच स्टेडियमला भेट देण्यासाठी पर्यटकांची संख्या वाढण्याची शक्यता आहे. लेहपासून प्रस्तावित स्टेडियमचे अंतर अंदाजे 17 किलोमीटर असल्याचे सांगितले जात आहे.

स्थानिक खेळाडूंना मिळणार मोठी संधी

या स्टेडियमचा सर्वाधिक फायदा लद्दाखमधील नवोदित क्रिकेटपटूंना होऊ शकतो. सध्या या प्रदेशातील खेळाडूंना उच्च दर्जाच्या मैदानावर नियमित सराव करण्यासाठी मर्यादित पर्याय उपलब्ध आहेत. नवीन स्टेडियममुळे प्रशिक्षण, स्थानिक स्पर्धा आणि देशांतर्गत सामन्यांसाठी चांगले व्यासपीठ उपलब्ध होण्याची अपेक्षा आहे.

लडाखमधील तरुणांना क्रिकेटमध्ये करिअर करण्यासाठी प्रेरणा मिळेल आणि स्थानिक पातळीवरून गुणवंत खेळाडू पुढे येण्यास मदत होऊ शकते. त्यामुळे हा प्रकल्प केवळ एका स्टेडियमपुरता मर्यादित न राहता संपूर्ण प्रदेशातील क्रीडा संस्कृतीला बळ देणारा ठरू शकतो.

भारताकडे आधीच आहे जगातील सर्वात मोठे स्टेडियम

विशेष म्हणजे, भारताच्या नावावर क्रिकेटमधील आणखी एक मोठा विक्रम आधीच आहे. अहमदाबादमधील नरेंद्र मोदी स्टेडियम हे प्रेक्षक क्षमतेच्या बाबतीत जगातील सर्वात मोठे क्रिकेट स्टेडियम आहे. जुन्या मोटेरा स्टेडियमच्या जागी नव्याने उभारण्यात आलेल्या या मैदानाचे उद्घाटन 2020 मध्ये झाले. येथे तब्बल 1 लाख 32 हजार प्रेक्षकांची आसनक्षमता आहे.

आता लडाखमध्ये प्रस्तावित स्टेडियम प्रत्यक्षात साकारले, तर भारताकडे एकाच वेळी जगातील सर्वात मोठे आणि जगातील सर्वात उंच क्रिकेट स्टेडियम अशी दोन वैशिष्ट्यपूर्ण मैदानं असतील. त्यामुळे भारतीय क्रिकेटच्या पायाभूत सुविधांच्या दृष्टीने हा प्रकल्प निश्चितच महत्त्वाचा ठरू शकतो.