ENG vs SL: इंग्लंड महिला क्रिकेट आणि श्रीलंका महिला क्रिकेट यांच्यात तीन एकदिवसीय सामन्यांची मालिका खेळवली जात आहे.

मालिकेतील तिसऱ्या सामन्यात इंग्लंडचा कर्णधार नॅट सेव्हियर ब्रंटने नाणेफेक जिंकून फलंदाजीचा निर्णय घेतला, जो योग्य ठरला.

या सामन्यात इंग्लंड संघाने श्रीलंकेला विजयासाठी 274 धावांचे लक्ष्य दिले होते. इंग्लंडसाठी सेव्हियर ब्रंटने झंझावाती शतक झळकावले आणि उत्कृष्ट खेळीच्या जोरावर अनेक मोठे विक्रम केले.

सेव्हियर ब्रंटने शानदार खेळी खेळली

ICC महिला खेळाडूंच्या क्रमवारीत पहिल्या क्रमांकाची फलंदाज आणि अष्टपैलू नॅट सेव्हियर ब्रंट उत्कृष्ट फॉर्ममध्ये होती. हा तिचा 100 वा एकदिवसीय सामना होता आणि तो संस्मरणीय बनवण्यात तिने कोणतीही कसर सोडली नाही.

पावसामुळे सामना नक्कीच प्रभावित झाला, पण तिने आपल्या विस्फोटक फलंदाजीने सर्वांची मने जिंकली. तिने माइया बाउचरसोबत मोठी भागीदारी रचली. या दोन खेळाडूंमुळेच इंग्लंडच्या महिला संघाला 273 धावांपर्यंत मजल मारता आली.

अशी करणारी ती पहिली खेळाडू ठरली

नेट सेव्हियर ब्रंटने 74 चेंडूत 18 चौकार आणि एक लांब षटकार मारत 120 धावा केल्या. तिने अवघ्या 66 चेंडूत शतक झळकावले. इंग्लंडसाठी (England) सर्वात जलद शतक झळकावणारी ती महिला खेळाडू ठरली आहे.

याशिवाय, आपल्या 100व्या सामन्यात शतक झळकावणारी ती पहिली महिला खेळाडू आहे. श्रीलंकेचे गोलंदाज तिच्यासमोर टिकू शकले नाहीत. दुसरीकडे, माइया बाउचरनेही शानदार खेळी खेळली, परंतु तिचे शतक पाच धावांनी हुकले.

इंग्लंडने 274 धावांचे लक्ष्य दिले होते

श्रीलंकेविरुद्ध इंग्लंड महिला क्रिकेट संघाची सुरुवात खूपच खराब झाली. जेव्हा टॅमी ब्युमॉंट अवघी एक धाव काढून पॅव्हेलियनमध्ये परतली. एलिस कॅप्सीही 6 धावा करुन बाद झाली.

पण यानंतर माइया बाउचर (95 धावा) आणि नॅट सेव्हियर ब्रंट (120 धावा) यांनी धावा काढण्याची जबाबदारी घेतली. बेस हिथने 21 धावांचे योगदान दिले.

याशिवाय, कोणत्याही खेळाडूला मोठी खेळी करता आली नाही. श्रीलंकेकडून कविशा दिलहरीने सर्वाधिक तीन बळी घेतले.