FC Goa in Indian Super League Football: सामन्याच्या पूर्वार्धातील इंज्युरी टाईममध्ये रॉलिन बोर्जिस याने केलेल्या गोलच्या बळावर एफसी गोवा संघाने इंडियन सुपर लीग (आयएसएल) फुटबॉल स्पर्धेत अग्रस्थान मिळविले.

केरळा ब्लास्टर्सला 1-0 फरकाने नमवून मानोलो मार्केझ यांच्या मार्गदर्शनाखालील संघाने अपराजित घोडदौडही कायम राखली. सामना फातोर्डा येथील पंडित जवाहरलाल नेहरू स्टेडियमवर रविवारी झाला.

सामन्यात निर्णायक ठरलेला गोल रॉलिन याने 45+1व्या मिनिटास व्हिक्टर रॉड्रिगेझ याच्या असिस्टवर नोंदविला. एकंदरीत एफसी गोवाचा हा सात सामन्यांतील सहावा विजय ठरला. अन्य एका बरोबरीसह त्यांचे आता 19 गुण झाले आहेत.

पहिला क्रमांक मिळविताना त्यांनी केरळा ब्लास्टर्सवर दोन गुणांची आघाडी घेतली. स्पर्धेतील दुसऱ्या पराभवामुळे केरळा ब्लास्टर्सचे नऊ लढतीनंतर 17 गुण कायम राहिले.

घरच्या मैदानावर विजयी चौकार

आयएसएल स्पर्धेच्या दहाव्या मोसमात एफसी गोवा संघाने रविवारी फातोर्डा येथे सलग चौथा विजय नोंदविला. भक्कम बचावाचे प्रदर्शन कायम राखताना पाचव्या सामन्यात क्लीन शीट राखली.

केरळा ब्लास्टर्सने एफसी गोवाने आघाडी घेतल्यानंतर बरोबरीसाठी प्रयत्न केले, परंतु संदेश झिंगनचा समावेश असलेल्या बचावफळीने प्रतिस्पर्ध्यांना विशेष मोकळीक दिली नाही. गोलरक्षक अर्शदीप सिंग याने दक्षता राखली.

एफसी गोवाचा पुढील सामना 12 डिसेंबर रोजी मुंबई सिटी एफसीविरुद्ध फातोर्डा येथेच खेळला जाईल.