Fan Injured in IPL 2026 Stadium: आयपीएल 2026 चा 40 वा सामना राजस्थान रॉयल्स आणि पंजाब किंग्स यांच्यात मुल्लांपूरच्या मैदानावर खेळला गेला. या सामन्यात राजस्थानने पंजाबला पराभवाची धूळ चारली असली, तरी एका दुर्दैवी घटनेने या विजयाच्या आनंदावर विरजण पडले. पंजाब किंग्सच्या फलंदाजीदरम्यान एका चाहत्याला चेंडू थेट तोंडावर लागून तो गंभीर जखमी झाल्याची घटना घडली. या अपघाताचा व्हिडिओ सोशल मीडियावर वेगाने व्हायरल होत असून क्रिकेटच्या मैदानातील सुरक्षिततेबाबत पुन्हा एकदा चर्चा सुरु झाली.

ही घटना पंजाब किंग्सच्या (Punjab Kings) डावाच्या सुरुवातीला घडली. सलामीवीर प्रियांश आर्या मैदानात फटकेबाजी करत होता. एका चेंडूवर प्रियांशने अत्यंत जोरात फटका मारला आणि चेंडू थेट स्टँड्समध्ये गेला. दुर्दैवाने, हा वेगवान चेंडू तिथे सामना पाहणाऱ्या एका चाहत्याच्या थेट तोंडावर लागला. चेंडूचा वेग इतका जास्त होता की, त्या चाहत्याच्या चेहऱ्यातून क्षणात रक्ताच्या धारा वाहू लागल्या. जखमी झालेला चाहता पंजाब किंग्सचा चाहता असल्याचे दिसत असून त्याच्या हातात संघाचा झेंडा होता.

त्याचवेळी, आजूबाजूला बसलेल्या प्रेक्षकांनी तातडीने त्या चाहत्याला घेरले आणि प्राथमिक मदतीसाठी प्रयत्न केले. प्रियांश आर्याने या सामन्यात 11 चेंडूत 29 धावांची छोटी पण आक्रमक खेळी खेळली, मात्र त्याच्या एका शॉटने चाहत्याला दवाखान्याची पायरी चढायला लावली.

सामन्याबद्दल बोलायचे झाल्यास, राजस्थान रॉयल्सने या हंगामात अजिंक्य असलेल्या पंजाब किंग्सचा विजयरथ रोखला. पंजाबने विजयासाठी ठेवलेले 223 धावांचे अवाढव्य लक्ष्य राजस्थानने 4 चेंडू राखून पूर्ण केले. राजस्थानच्या विजयात वैभव सूर्यवंशीचा मोठा वाटा राहिला, त्याने अवघ्या 16 चेंडूत 43 धावांची वादळी खेळी खेळली. त्यानंतर डोनोवन फरेरा आणि शुभम दुबे यांनी 32 चेंडूत 77 धावांची अभेद्य भागीदारी करत संघाला अशक्य वाटणारा विजय मिळवून दिला. फरेराला त्याच्या आक्रमक अर्धशतकासाठी 'प्लेअर ऑफ द मॅच' पुरस्काराने गौरविण्यात आले. राजस्थानने या विजयासह गुणतालिकेत तिसऱ्या स्थानी झेप घेतली, तर दुसरीकडे जखमी चाहत्याच्या प्रकृतीसाठी क्रीडाप्रेमी प्रार्थना करत आहेत.