Vijaykumar Vyshak's Yorker end Jason Roy's innings: इंडियन प्रीमियर लीग 2023 स्पर्धेतील 36 वा सामना रॉयल चॅलेंजर्स बेंगलोर विरुद्ध कोलकाता नाईट रायडर्स संघात झाला. एम चिन्नास्वामी स्टेडियमवर झालेल्या या सामन्यात कोलकाताने प्रथम फलंदाजी करताना जेसन रॉयच्या अर्धशतकाच्या जोरावर 200 धावांचा डोंगर उभा केला. पण या सामन्यात विजयकुमार वैशाखने रॉयला ज्याप्रकारे त्रिफळाचीत केले, त्या चेंडूने सर्वांचेच लक्ष वेधले.

या सामन्यात बेंगलोरचा प्रभारी कर्णधार विराट कोहलीने नाणेफेक जिंकत कोलकाताला प्रथम फलंदाजीसाठी आमंत्रित केले होते. पण कोलकाताकडून जेसन रॉय आणि एन जगदीशन यांनी चांगली सुरुवात दिली. त्यांनी सलामीला 83 धावांची भागीदारी केली. या भागीदारीदरम्यान रॉयने अर्धशतकही पूर्ण केले.

पण, त्यांची भागीदारी धोकादायक ठरत असतानाच 10 व्या षटकात विजयकुमार वैशाखने दोघांनाही बाद केले. पण त्याने रॉयला बाद करताना टाकलेला चेंडूने सर्वांनाच प्रभावित केले. वैशाखने 10 व्या षटकाच्या दुसऱ्या चेंडूवर एन जगदीशनला 27 धावांवर बाद केले.

त्यानंतर वैशाखने या षटकातील अखेरचा चेंडू लेग स्टंपजवळ यॉर्कर लेंथला टाकला. तो चेंडू रॉयला खेळताच आला नाही आणि तो त्रिफळाचीत झाला. या विकेटसाठी वैशाखचे अनेकांनी कौतुक केले. रॉय 29 चेंडूत 4 चौकार आणि 5 षटकारांसह 56 धावांची खेळी करून बाद झाला.

दरम्यान, सलामीवीर परत पॅव्हेलियनमध्ये परतल्यानंतर कोलकाताचा डाव कर्णधार नितीश राणा आणि वेंकटेश अय्यर यांनी सांभाळला. या दोघांनीही अर्धशतकी भागीदारी केली. त्यांनी 80 धावांची भागीदारी केली. पण ते दोघेही 18 व्या षटकात बाद झाले. दोघांनाही वनिंदू हसरंगाने बाद केले. राणाने 21 चेंडूत 48 धावांची खेळी केली, तसेच वेंकटेशने 26 चेंडूत 31 धावांची खेळी केली.

अखेरीस डेव्हिड विसे आणि रिंकू सिंगने नाबाद राहात काही आक्रमक शॉट्स खेळल्याने कोलकाता 20 षटकात 5 बाद 200 धावांपर्यंत पोहचू शकले. विसे 12 आणि रिंकू 18 धावांवर नाबाद राहिले.

बेंगलोरकडून वैशाख आणि हसरंगा यांनी प्रत्येकी 2 विकेट्स घेतले. तसेच मोहम्मद सिराजने 1 विकेट घेतली.