Wriddhiman Saha forced Hardik Pandya to take an DRS: इंडियन प्रीमियर लीग 2023 स्पर्धेतील 18 वा सामना पंजाब किंग्स विरुद्ध गुजरात टायटन्स संघात गुरुवारी (13 एप्रिल) पार पडला. या सामन्यात गुजरात टायटन्सने 6 विकेट्सने विजय मिळवला. दरम्यान, या सामन्यात गुजरातचा यष्टीरक्षक वृद्धिमान साहाने दाखवलेल्या चतुराईने अनेकांनी कौतुक केले आहे.

झाले असे की या सामन्यात पंजाब संघ प्रथम फलंदाजी करत होता. यावेळी 13व्या षटकात गुजरातकडून मोहित शर्मा गोलंदाजी करत होता. या षटकातील दुसऱ्या चेंडूवर पंजाबचा फलंदाज जितेश शर्मा बीट झाला. त्याच्या बॅटच्या जवळून चेंडू गेला. तो चेंडू यष्टीरक्षण करत असलेल्या साहाने पकडला. त्यानंतर त्याने जोरदार अपीलही केले.

पण हे अपील त्याने एकट्यानेच केले. मोहित किंवा अन्य सहकाऱ्यांना फारसे जोरदार अपील केले नाही. पंचांनीही जितेशला नाबाद घोषित केले. पण साहाने गुजरातचा कर्णधार हार्दिक पंड्याला रिव्ह्यू घेण्यासाठी सांगितले. सुरुवातीला हार्दिक तयार होत नव्हता, पण साहाचा आग्रह पाहाता त्याने एकदम अखेरच्या क्षणी रिव्ह्यू घेतला.

महत्त्वाचे म्हणजे रिव्ह्यूमध्ये चेंडूने जितेशच्या बॅटला हलकासा स्पर्श केल्याचे स्पष्ट झाले. त्यामुळे पंचांना आपला निर्णय बदलावा लागला आणि जितेश 25 धावा करून माघारी परतला. या यशस्वी रिव्ह्यूनंतर हार्दिकही खूश झाला, तसेच गुजरातमधील खेळाडूंनीही साहाच कौतुक केले.

या सामन्यात पंजाबने प्रथम फलंदाजी करताना 20 षटकात 8 बाद 153 धावा केल्या. त्यांच्याकडून मॅथ्यू शॉर्टने सर्वाधिक 36 धावांची खेळी केली. तसेच गुजरातकडून मोहित शर्माने सर्वाधिक 2 विकेट्स घेतल्या.

त्यानंतर 154 धावांच्या आव्हानाचा पाठलाग करताना गुजरातकडून शुभमन गिलने अर्धशतकी खेळी केली. त्याने 49 चेंडूत 67 धावांची खेळी केली. तसेच वृद्धिमान साहाने 30 धावांची खेळी केली. त्यामुळे 19.5 षटकात गुजरातने ४ विकेट्स गमावत 154 धावा करत सामना जिंकला. पंजाबकडून अर्शदीप सिंग, कागिसो रबाडा, हरप्रीत ब्रार आणि सॅम करन यांनी प्रत्येकी 1 विकेट घेतली.