Ajinkya Rahane withdraw from his stint with county club Leicestershire:

भारताचा मधल्या फळीतील फलंदाज अजिंक्य रहाणे नुकताच वेस्ट इंडिज दौऱ्यातून दोन कसोटी सामन्यांच्या मालिकेनंतर भारतात परतला आहे. त्यानंतर लगेचच त्याने मोठा निर्णय घेतला आहे. त्याने इंग्लंडमधील काउंटी क्लब लिसेस्टरशायर संघाकडून चालू हंगामात खेळण्यास नकार दिला आहे.

रहाणेने भारतीय कसोटी संघात जून महिन्यात पुनरागमन करण्यापूर्वी लिसेस्टरशायरकडून खेळण्यासाठी करार केला होता. त्यामुळे तो ऑगस्टमध्ये लिसेस्टरशायरकडून वनडे कप खेळण्याची अपेक्षा केली जात होती. मात्र, त्याने आता माघार घेतली आहे. क्रिकेटमधून काही काळ विश्रांती घेण्यासाठी त्याने हा निर्णय घेतला आहे.

दरम्यान, भारताला पुढील कसोटी मालिका दक्षिण आफ्रिकेविरुद्ध डिसेंबर-जानेवारी दरम्यान खेळायची आहे. त्यामुळे आता त्यावेळी रहाणे पुन्हा भारताकडून खेळताना दिसू शकतो.

तथापि, पीटर हंँड्सकॉम्बने रहाणेचा बदली खेळाडू म्हणून लिसेस्टरशायरबरोबरील करार वाढवला आहे. त्याने या संघाकडून टी20 ब्लास्टर स्पर्धा आणि काउंटी चॅम्पियनशीप स्पर्धा खेळली आहे.

लिसेस्टरशायरने याबाबत माहिती दिली आहे. त्यांनी माहिती दिली आहे की रहाणेने त्याच्या वाढलेल्या आंतरराष्ट्रीय वचनबद्धतेमुळे त्याच्या काउंटीबरोबरील करारात बदल झाला आहे. त्याने आता ऑगस्ट-सप्टेंबर दरम्यान क्रिकेटमधून विश्रांती घेण्याची इच्छा व्यक्त केली आहे.

लिसेस्टरशायरचे क्रिकेट संचालक क्लाउड हेंडरसन यांनी सांगितले की 'आम्ही अजिंक्य रहाणेची परिस्थितीत समजू शकतो. त्याच्यासाठी गेले काही महिने व्सस्त राहिले आहेत. आम्ही त्याची तंदुरुस्त होण्याची आणि कुटुंबाबरोबर वेळ घालवण्यासाठी वेळ हवा असल्याची त्याची विनंती स्विकारत आहोत.'

'आम्ही अजिंक्य रहाणेबरोबर सातत्याने संपर्कात असून क्रिकेटमध्ये परिस्थितीत झटक्यात बदलू शकते, हे स्विकारतो. आम्ही समजून घेतल्याबद्दल रहाणे कृतज्ञ आहे आणि त्याने एक दिवस लिसेस्टरशायरबरोबर खेळण्याची आशाही बाळगली आहे.'

रहाणेने जून महिन्यात ऑस्ट्रेलियाविरुद्ध झालेल्या कसोटी चॅम्पियनशीप 2021-23 स्पर्धेच्या अंतिम सामन्यातून जवळपास 18 महिन्यांनी भारतीय संघात पुनरागमन केले होते. त्या सामन्यात त्याने 89 आणि 46 धावांची खेळी केली होती.

पण नंतर वेस्ट इंडिजविरुद्धच्या कसोटी मालिकेत त्याला खास काही करता आले नव्हते. त्याने खेळलेल्या या दोन्ही सामन्यात दोन डावात फलंदाजी करताना 3 आणि 8 धावांची खेळी केली होती.