India vs Zimbabwe T20 Series Match Timing: भारत आणि झिम्बाब्वे यांच्यातील तीन सामन्यांची टी-20 आंतरराष्ट्रीय मालिका दोन दिवसांवर येऊन ठेपली आहे. या मालिकेत श्रेयस अय्यर भारतीय संघाचे नेतृत्व करताना दिसणार असून, अनेक युवा खेळाडूंच्या समावेशामुळे भारतीय संघ पूर्णपणे नव्या रुपात मैदानात उतरणार आहे. या मालिकेतील पहिला सामना 23 जुलै रोजी खेळवला जाणार आहे. मात्र, जर तुम्ही संध्याकाळी सात किंवा साडेसात वाजता सामना सुरु होण्याची वाट पाहत असाल, तर तुमच्याकडून सामना चुकण्याची दाट शक्यता आहे. त्यामुळे क्रिकेट चाहत्यांनी सामन्याची अचूक वेळ आताच नोंदवून ठेवणे अत्यंत गरजेचे आहे.

भारत आणि झिम्बाब्वे यांच्यातील सर्व सामने भारतीय वेळेनुसार दुपारी 4:30 वाजता सुरु होतील, तर सामन्याच्या अर्धा तास आधी म्हणजेच दुपारी 4:00 वाजता नाणेफेक (टॉस) होईल. त्यामुळे सर्व 20 षटकांचा खेळ पूर्ण झाल्यास सामना संध्याकाळी साधारण आठ वाजेपर्यंत संपेल. इंग्लंड दौऱ्यानंतर भारतीय संघ आता झिम्बाब्वेमध्ये दाखल झाला असून खेळाडूंनी जोरदार सराव सुरु केला आहे. या मालिकेत युवा फलंदाज अभिषेक शर्मा आणि वैभव सूर्यवंशी यांच्या कामगिरीवर सर्वांचे लक्ष असेल. विशेषतः वैभव सूर्यवंशीला या तिन्ही सामन्यांमध्ये खेळण्याची संधी मिळण्याची दाट शक्यता आहे. इंग्लंडविरुद्धच्या मालिकेत त्याला फारशी चमक दाखवता आली नव्हती, त्यामुळे स्वतःला सिद्ध करण्याची ही त्याच्यासाठी मोठी संधी आहे.

झिम्बाब्वेच्या (Zimbabwe) खेळपट्ट्यांवर धावा काढणे सहसा सोपे नसते. नुकत्याच झालेल्या बांगलादेश विरुद्ध झिम्बाब्वे मालिकेत एकाही सामन्यात दोनशेहून अधिक धावांचा टप्पा ओलांडता आला नव्हता. मात्र, ते सामने बुलावायो येथे झाले होते, तर भारताचे सर्व सामने हरारे येथे खेळवले जाणार आहेत. त्यामुळे हरारेची खेळपट्टी फलंदाजांना साथ देते की गोलंदाजांना, हे 23 जुलैला पहिल्याच सामन्यात स्पष्ट होईल.

झिम्बाब्वे दौऱ्यासाठी भारतीय संघ: श्रेयस अय्यर (कर्णधार), वैभव सूर्यवंशी, अभिषेक शर्मा, तिलक वर्मा (उपकर्णधार), ईशान किशन (यष्टीरक्षक), प्रभसिमरन सिंग (यष्टीरक्षक), शिवम दुबे, सूर्यांश शेडगे, रिंकू सिंह, हर्ष दुबे, प्रिन्स यादव, यश ठाकूर, अशोक शर्मा, मयंक यादव, रवी बिश्नोई.