India vs Sri Lanka: भारत विरुद्ध श्रीलंका यांच्यातील वनडे मालिकेला मंगळवारी सुरुवात होणार आहे. या मालिकेपूर्वी कर्णधार रोहित शर्माने संघ संयोजनाबद्दल आपली मते व्यक्त केली आहेत. या मालिकेतून रोहित देखील दुखापतीनंतर भारतीय संघात पुनरागमन करणार आहे.

या मालिकेदरम्यान सलामीसाठी शुभमन गिलला ईशान किशनऐवजी पसंती दिली जाणार असल्याचे रोहितने स्पष्ट केले आहे. तसेच चौथ्या क्रमांकासाठी श्रेयस अय्यर आणि सूर्यकुमार यादव यांच्यामध्ये कोणाला संधी मिळणार हा मोठा पेच आहे.

गिल आणि किशन यांच्यापैकी कोणाला संधी मिळणार याबद्दल बोलताना रोहित म्हणाला, 'दोघेही चांगले आहेत. पण गिलला संधी देणे योग्य राहिल, जेणेकरून त्याला काही धावा करण्याची संधी मिळेल. गेल्या काही सामन्यांमध्ये गिल आणि इशान यांनी खूप धावा काढल्या आहेत. ईशानने तर द्विशतकही केले आहे. हे मोठे यश आहे. पण यापूर्वीही ज्याने चांगली कामगिरी केली आहे, त्याला संधी देणे योग्य असेल.'

'ईशानला न खेळवणे दुर्दैवी असेल. पण गेल्या 8-9 महिन्यात ज्याप्रकारे गोष्टी झाल्या आहेत, ते पाहाता गिलला संधी देणे योग्य असेल. त्याने सलामीला चांगली कामगिरी केली आहे. जरी ईशानला संधी मिळाली नाही, तरी तो कोणत्याही गोष्टीतून बाहेर झालेला नाही. आम्ही संघात सर्वांना संधी देऊन पाहाणार आहोत, पुढे अनेक सामने खेळायचे आहेत.'

ईशानने गेल्या महिन्यात बांगलादेशविरुद्धच्या वनडे मालिकेतील सामन्यांत द्विशतकी खेळी केली होती. तो वनडेत द्विशतक करणारा भारताचा चौथा खेळाडू ठरला होता.

त्याचबरोबर मधल्या फळीतील पेचाबद्दल रोहित म्हणाला, 'अशी डोकेदुखी असणे चांगेल आहे. आम्ही वनडे क्रिकेटमध्ये आणि कोणत्या परिस्थितीत कोणी चांगली कामगिरी केली आहे, हे पाहू. समस्या तेव्हा होतात, जेव्हा तूम्ही वेगवेगळ्या प्रकारांची तुलना करू लागता.'

'आम्ही शेवटच्या 8-9 महिन्यांमध्ये काय झाले आहे, त्याचा विचार करू. वनडेमध्ये ज्याने चांगली कामगिरी केली आहे, त्याला संधी मिळेल. आम्ही वेगवेगळ्या प्रकारात खेळलेल्या खेळाडूंची तुलना करू. लय महत्त्वाची आहे, पण क्रिकेट प्रकार देखील महत्त्वाचा आहे. वनडे क्रिकेट वेगळा प्रकार आहे. टी20 क्रिकेटपेक्षा तो थोडा मोठा आहे. ज्या खेळाडूने चांगली कामगिरी केली आहे, त्याला नक्कीच संधी दिली जाईल.'

दरम्यान आता गेल्यावर्षभराचा विचार करायचा झाल्यास वनडे क्रिकेटमध्ये श्रेयस अय्यरची कामगिरी सूर्यकुमारपेक्षा वरचढ राहिली आहे. त्यामुळे पहिल्या वनडेत तरी श्रेयसला संधी मिळण्याची शक्यता आहे.