India vs Sri Lanka: भारत विरुद्ध श्रीलंका संघात टी20 मालिकेतील दुसरा सामना पुण्यातील महाराष्ट्र क्रिकेट असोसिएशनवर गुरुवारी पार पडला. या सामन्यात भारताला 16 धावांनी पराभवाचा सामना करावा लागला. पण भारताकडून अक्षर पटेलने विजय मिळवून देण्यासाठी केलेल्या प्रयत्नाचे सध्या कौतुक होत आहे.

या सामन्यात भारताला श्रीलंकेने 207 धावांचे आव्हान दिले होते. या आव्हानाचा पाठलाग करताना भारतीय वरची फळी झटपट बाद झाली. एक वेळ अशी होती की भारताचा अर्धा संघ 57 धावांवर बाद झाला होता. पण त्यानंतर सूर्यकुमार कुमार आणि अक्षर पटेलने भारताचा डाव सांभाळला आणि सहाव्या विकेटसाठी 91 धावांची भागीदारी केली.

सूर्यकुमार आणि अक्षर यांनी आक्रमक फलंदाजी करताना वैयक्तिक अर्धशतकेही साजरी केली. अक्षरने तर 20 चेंडूत अर्धशतक पूर्ण केले. दरम्यान, त्याने वनिंदू हसरंगाने गोलंदाजी केलेल्या 14 व्या षटकात तर सलग तीन षटकार मारले. त्याने हे तिन्ही षटकार 14 व्या षटकाच्या पहिल्या तिन्ही चेंडूवर ठोकले. त्याच्या या तिन्ही षटकारांनी सामन्यात रोमांच आणला होता.

त्याच्यानंतर याच षटकाच्या पाचव्या चेंडूवर सूर्यकुमार यादवनेही एक षटकार ठोकला. त्यामुळे या संपूर्ण षटकात 26 धावा निघाल्या. त्यानंतरही या दोघांनी चांगला खेळ सुरू ठेवला होता. मात्र, 16 व्या षटकात सूर्यकुमार यादव 51 धावांवर बाद झाला. पण त्यानंतरही अक्षर पटेलला शिवम मावीने साथ दिली होती.

व्हिडिओ पाहाण्यासाठी येथे क्लिक करा

अखेरच्या षटकात भारताला विजयासाठी 21 धावांची गरज होती. मात्र, श्रीलंकेचा कर्णधार दसून शनकाने या षटकात गोलंदाजी करण्याचा निर्णय घेतला आणि त्याने या षटकात केवळ 4 धावा दिल्या आणि अक्षर पटेलला 65 धावांवर आणि शिवम मावीला 26 धावांवर बाद केले. त्यामुळे भारताचा डाव 20 षटकात 8 बाद 190 धावांवर संपला.

तत्पूर्वी, प्रथम फलंदाजी करणाऱ्या श्रीलंकेकडून दसून शनकाने सर्वाधिक 56 धावांची नाबाद खेळी केली, तसेच कुशल मेंडिलने 52 धावांची खेळी केली. पाथम निसंकाने 33 आणि चरिथ असलंकाने 37 धावांची छोटेखानी, पण महत्त्वपूर्ण खेळी केल्या. त्यामुळे श्रीलंकेने 20 षटकात 6 बाद 206 धावा केल्या. भारताकडून उमरान मलिकने सर्वाधिक 3 विकेट्स घेतल्या.

दरम्यान आता मालकेत 1-1 अशी बरोबरी झाली असल्याने 7 जानेवारी रोजी होणारा तिसरा टी20 सामना निर्णायक ठरणार आहे.