India vs England 4th Test Match in Ranchi, Playing XI :

भारत विरुद्ध इंग्लंड संघात सध्या पाच सामन्यांची कसोटी मालिका सुरू आहे. या मालिकेतील चौथ्या सामन्याला शुक्रवारपासून (23 फेब्रुवारी) रांचीमधील जेएससीए आंतरराष्ट्रीय स्टेडियममध्ये खेळवला जाणार आहे. या सामन्यात इंग्लंडने नाणेफेक जिंकून प्रथम फलंदाजी करण्याचा निर्णय घेतला आहे.

भारताकडून आकाश दीपचे पदार्पण

या सामन्यासाठी भारताच्या प्लेइंग इलेव्हनमध्ये बदल झाला आहे. जसप्रीत बुमराहला या सामन्यासाठी विश्रांती देण्यात आली आहे. त्याचमुळे त्याच्याजागेवर बंगालचा वेगवान गोलंदाज आकाश दीपला संधी देण्यात आली आहे. त्यामुळे तो या सामन्यातून भारताकडून आंतरराष्ट्रीय पदार्पण करत आहे.

त्याला राहुल द्रविडच्या हस्ते कसोटी पदार्पणाची कॅप देण्यात आली. तो भारताकडून कसोटीत पदार्पण करणारा 313 वा खेळाडू ठरला आहे. याव्यतिरिक्त भारताच्या प्लेइंग इलेव्हनमध्ये बदल करण्यात आलेला नाही.

इंग्लंडच्या संघात दोन बदल

या सामन्यासाठी इंग्लंडने प्लेइंग इलेव्हनमध्ये दोन मोठे बदल केले आहेत. चौथ्या कसोटीसाठी निवडलेल्या प्लेइंग इलेव्हनमध्ये शोएब बशीर आणि ऑली रॉबिन्सन यांचे इंग्लंडच्या प्लेइंग इलेव्हनमध्ये पुनरागमन झाले आहे. त्यांना मार्क वूड आणि रेहान अहमद यांच्या जागेवर प्लेइंग इलेव्हनमध्ये संधी देण्यात आली आहे.

असे आहेत प्लेइंग इलेव्हन -

• भारत - यशस्वी जयस्वाल, रोहित शर्मा (कर्णधार), शुभमन गिल, रजत पाटीदार, सर्फराज खान, रवींद्र जडेजा, ध्रुव जुरेल (यष्टीरक्षक), रविचंद्रन अश्विन, आकाश दीप, कुलदीप यादव, मोहम्मद सिराज

• इंग्लंड - झॅक क्रावली, बेन डकेट, ऑली पॉप, जो रुट, जॉनी बेअरस्टो, बेन स्टोक्स (कर्णधार), बेन फोक्स, टॉम हर्टली, ऑली रॉबिन्सन, जेम्स अँडरसन, शोएब बशीर

मालिकेत भारतीय संघ आघाडीवर

या मालिकेतील आत्तापर्यंत झालेल्या तीन सामन्यांपैकी पहिल्या सामन्यात इंग्लंडने विजय मिळवला होता. तसेच नंतर भारतीय संघाने पुनरागमन करत दुसरा आणि तिसरा सामना जिंकला. त्यामुळे तीन सामन्यांनंतर भारताने 2-1 अशी आघाडी मालिकेत घेतलेली आहे.

त्यामुळे जर भारताने रांचीत होत असलेला कसोटी सामना जिंकला, तर मालिकेतही विजयी आघाडी घेता येईल. मात्र, जर इंग्लंडने रांची कसोटी जिंकली, तर मालिकेत 2-2 अशी बरोबरी होईल आणि अखेरचा सामना निर्णायक ठरेल.

तसेच जर चौथा कसोटी सामना अनिर्णित राहिला, तर भारतीय संघच मालिकेत आघाडीवर राहिल.