19 वर्षांखालील आशिया कप 2026 मध्ये भारतीय संघाला पाकिस्तानविरुद्धच्या सामन्यात पराभवाचा सामना करावा लागला. 8 नोव्हेंबर रोजी झालेल्या या अटीतटीच्या लढतीत पाकिस्तानने भारतावर 3 विकेट्सने मात केली. या पराभवामुळे भारतीय संघाच्या उपांत्य फेरीच्या वाटचालीत अडथळा निर्माण झाला असला, तरी स्पर्धेतील आव्हान अद्याप संपलेले नाही. भारताला सेमीफायनलमध्ये पोहोचण्याची संधी कायम आहे. मात्र, त्यासाठी आगामी सामन्यात विजय मिळवणे अत्यंत आवश्यक आहे.
विशेष म्हणजे, भारत आणि संयुक्त अरब अमिराती (UAE) यांच्यातील सामना आता दोन्ही संघांसाठी निर्णायक ठरणार आहे. या सामन्यातील निकालावर भारताचे स्पर्धेतील भवितव्य अवलंबून असेल. त्यामुळे युवा भारतीय खेळाडूंना पाकिस्तानविरुद्धच्या पराभवातून सावरून दमदार पुनरागमन करावे लागणार आहे.
भारत आणि पाकिस्तान यांच्यातील सामना 8 नोव्हेंबर रोजी खेळवण्यात आला. प्रथम फलंदाजी करताना भारतीय संघाला 46.3 षटकांत सर्वबाद 208 धावा करता आल्या. त्यानंतर पाकिस्तानच्या संघाने 48.1 षटकांत 7 विकेट्स गमावत 209 धावांचे लक्ष्य पूर्ण केले. पाकिस्तानने हा सामना 3 विकेट्सने जिंकला. या पराभवामुळे भारतीय संघाला गुणतालिकेत महत्त्वाचे गुण गमवावे लागले. आता पुढील सामन्यात कोणतीही चूक करण्याची संधी संघाकडे नाही.
या स्पर्धेच्या गट अ मध्ये भारत, पाकिस्तान, यूएई आणि नेपाळ या चार संघांचा समावेश आहे. प्रत्येक गटातील अव्वल दोन संघांना उपांत्य फेरीत प्रवेश मिळणार आहे.
भारताने सुरुवातीच्या सामन्यात नेपाळला 10 विकेट्सने पराभूत केले होते. त्यानंतर पाकिस्तानविरुद्ध पराभव झाला. दुसरीकडे, यूएईने नेपाळला 7 विकेट्सने हरवले आहे. त्यामुळे भारत आणि यूएई या दोन्ही संघांच्या खात्यात सध्या प्रत्येकी 2 गुण आहेत. पाकिस्तानने भारत आणि यूएई या दोन्ही संघांविरुद्ध विजय मिळवून 4 गुण मिळवले आहेत.
भारताला 10 नोव्हेंबर रोजी यूएईविरुद्ध सामना खेळायचा आहे. या सामन्यात भारतीय संघाने विजय मिळवल्यास त्याचे 4 गुण होतील आणि उपांत्य फेरीतील स्थान निश्चित होईल. मात्र, पराभव झाल्यास भारताचे आव्हान संपुष्टात येईल. त्यामुळे हा सामना भारतीय संघासाठी 'करो किंवा मरो' असा असणार आहे.
पाकिस्तानविरुद्धच्या सामन्यात भारतीय संघाची फलंदाजी अपेक्षेप्रमाणे झाली नाही. त्यामुळे यूएईविरुद्धच्या सामन्यात आघाडीच्या फलंदाजांवर मोठी जबाबदारी असेल. सलामीवीर आर्यवीर सेहवाग आणि कर्णधार लक्ष्य राजेश रायचंदानी यांना संघाला भक्कम सुरुवात करून द्यावी लागेल.
याशिवाय यष्टिरक्षक अन्वय द्रविड याच्याकडूनही चांगल्या खेळीची अपेक्षा असेल. पाकिस्तानविरुद्ध शतक झळकावणाऱ्या अर्जुन राजपूतकडून पुन्हा एकदा मोठ्या खेळीची आशा चाहत्यांना आहे. मधल्या फळीतील फलंदाजांनीही परिस्थितीनुसार जबाबदारी स्वीकारणे आवश्यक आहे.
भारत आणि यूएई यांच्यातील सामना 10 नोव्हेंबर रोजी ओमानमधील अल अमेरात क्रिकेट मैदानावर खेळवला जाणार आहे. या सामन्यातील विजय भारताला थेट उपांत्य फेरीत घेऊन जाईल. त्यामुळे गोलंदाजी, फलंदाजी आणि क्षेत्ररक्षण या तिन्ही विभागांत भारतीय खेळाडूंना सर्वोत्तम कामगिरी करावी लागेल.
19 वर्षांखालील आशिया कपच्या उपांत्य फेरीचे सामने 12 नोव्हेंबर रोजी होणार आहेत. गट अ मधील पहिल्या क्रमांकाचा संघ गट ब मधील दुसऱ्या क्रमांकाच्या संघाशी खेळेल. तर गट ब मधील अव्वल संघाचा सामना गट अ मधील दुसऱ्या क्रमांकाच्या संघाशी होईल. स्पर्धेचा अंतिम सामना 14 नोव्हेंबर रोजी खेळवला जाणार आहे.
भारत अंडर-19 संघ : लक्ष्य राजेश रायचंदानी (कर्णधार), अन्वय द्रविड (यष्टिरक्षक), रजत बघेल, आर्यवीर सेहवाग, व्ही. के. विनीत, यशवीर गौड, अर्जुन राजपूत, ईशान सूद, यशवर्धन चौहान, कुशाग्र ओझा, शविन विनोद, काव्या पटेल, मोहित उल्वा, मनाल चौहान आणि आर्यन सवसानी.
यूएई अंडर-19 संघ : अयान मिस्बाह (कर्णधार), मोहम्मद नफीस (यष्टिरक्षक), यायिन राय, उदिश सूरी, नूरुल्लाह अयोबी, झैनुल्लाह रहमानी, अहमद खुदादाद, नसीम खान, रायझल नादिर, उमर तौकीर, मोहम्मद उमर फैसल आणि हिदायतुल्लाह खान.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.