India vs Afghanistan, 2nd T20I match at Indore:

भारत विरुद्ध अफगाणिस्तान संघात सध्या टी20 मालिका सुरू असून दुसरा सामना रविवारी (14 जानेवारी) होत आहे. इंदूरच्या होळकर क्रिकेट स्टेडियमवर होत असलेल्या या सामन्यात अफगाणिस्तानने भारतासमोर 173 धावांचे लक्ष्य ठेवले आहे.

या सामन्यात भारताने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे अफगाणिस्तान संघ प्रथम फलंदाजीसाठी उतरला. 20 षटकात अफगाणिस्तानने सर्वबाद 172 धावा केल्या. भारतीय गोलंदाजांनी सांघिक कामगिरी केली.

इंदूरचे मैदान फलंदाजीसाठी पोषक समजले जाते, त्याचमुळे अफगाणिस्तानला 172 धावांत रोखण्याने भारतीय गोलंदाजांचं कौतुक होत आहे. दरम्यान असे असले तरी 172 धावा ही अफगाणिस्तानची भारताविरुद्धची आंतरराष्ट्रीय टी20 क्रिकेटमधील सर्वोच्च धावसंख्या आहे.

या सामन्यात प्रथम फलंदाजी करणाऱ्या अफगाणिस्तानकडून रेहमनुल्लाह गुरबाज आणि कर्णधार इब्राहिम झद्रान यांनी सलामीला फलंदाजी केली. त्यांनी चांगली सुरुवात देण्याचा प्रयत्न केला, मात्र 9 चेंडूत 14 धावा करणाऱ्या गुरजाबला रबी बिश्नोईने बाद केले.

नंतर गुलबदीन नायबने फटकेबाजी केली, त्याला इब्राहिम साथ देत होता. पण त्यांची 33 धावांची भागीदारी झाली असताना 8 धावांवर इब्राहिमला अक्षर पटेलने त्रिफळाचीत केले. त्यानंतर लगेचच शिवम दुबेने अझमतुल्लाह ओमरझाईला 2 धावांवर त्रिफळाचीत केले.

गुलबदिनला मोहम्मद नबीने साथ देण्याचा प्रयत्न केला. मात्र, नबीला मोठे फटके खेळण्यापासून भारतीय गोलंदाजांनी रोखले होते. अखेर गुलबदिनच अर्धशतकानंतर अक्षर पटेलविरुद्ध खेळताना रोहित शर्माकडे झेल देत बाद झाला. गुबलदिनने 35 चेंडूत 57 धावांची खेळी केली.

नबीचा अडथळा 15 व्या षटकात रवी बिश्नोईने दूर केला. नबीने 18 चेंडूत 14 धावाच केल्या. यानंतरही नजिबुल्लाह झद्रान (23), करिम जनात (20) आणि मुजीब उर रेहमान (21) छोटेखानी पण आक्रमक खेळी करून बाद झाले. त्यामुळे तिमान अफगाणिस्तानला 179 धावांचा टप्पा पार करता आला. अखेरीस फझलहक फारुकी शेवटच्या चेंडूवर धावबाद झाला.

भारताकडून गोलंदाजी करताना अर्शदीपने सर्वाधिक 3 विकेट्स घेतल्या, तसेच रवी बिश्नोई आणि अक्षर पटेल यांनी प्रत्येकी 2 विकेट्स घेतल्या, तर शिवम दुबेने एक विकेट घेतली.