India vs England, 4th Test in Ranchi:

भारत विरुद्ध इंग्लंड संघात कसोटी मालिकेतील चौथा सामना रांचीमध्ये शुक्रवारपासून (23 फेब्रुवारी) सुरु झाला आहे. या सामन्याच्या तिसऱ्या दिवशी भारताचा पहिला डाव संपला. भारताने पहिल्या डावात 103.2 षटकात सर्वबाद 307 धावा केल्या. त्यामुळे इंग्लंडला 46 धावांची आघाडी मिळाली.

भारताकडून अखेरची विकेट ध्रुव जुरेलची गेली. तो 90 धावांवर बाद झाला. इंग्लंडकडून शोएब बशीरने 5 विकेट्स घेतल्या.

या सामन्यात भारताने तिसऱ्या दिवशी पहिल्या डावात 74 षटकापासून आणि 7 बाद 219 धावांपासून पुढे खेळायला सुरुवात केली होती. यावेळी जुरेल 30 धावांवर आणि कुलदीप यादव 17 धावांवर नाबाद होते.

या दोघांनी संयमी खेळ करत पहिला तास जवळपास खेळून काढताना अर्धशतकी भागीदारीही केली. मात्र अखेर त्यांची जोडी जेम्स अँडरसनने 89 व्या षटकात मोडली. त्याने 131 चेंडूत 28 धावा करणाऱ्या कुलदीपला त्रिफळाचीत केले.

त्यानंतर आकाश दीपनेही जुरेलला चांगली साथ दिली होती. जुरेलने नंतर आक्रमक पवित्रा घेतला. त्याने त्याचे पहिले कसोटी अर्धशतकही पूर्ण केले. परंतु, त्याची आणि आकाश दीपची भागीदारी 40 धावांची झालेली असतानाच आकाशला शोएब बशीरने पायचीत करत आपल्या पाच विकेट्स पूर्ण केल्या.

अखेर 104 व्या षटकात जुरेलला टॉम हर्टलीने त्रिफळाचीत करत भारताचा डाव संपवला. जुरेलने 149 चेंडूत 6 चौकार आणि 4 षटकार ठोकत 90 धावांची खेळी केली. दरम्यान, त्याने 9 व्या आणि 10 व्या क्रमांकाच्या फलंदाजांबरोबर खेळताना केलेल्या भागीदाऱ्या या सामन्यात भारतासाठी महत्त्वाच्या ठरल्या.

दरम्यान, या सामन्यात भारताकडून पहिल्या डावात यशस्वी जयस्वालनेही दुसऱ्या दिवशी 73 धावांची अर्धशतकी खेळी केली होती. तसेच शुभमन गिलने 38 धावा केल्या होत्या. मात्र बाकी कोणाला खास काही करता आले नव्हते.

इंग्लंडकडून शोएब बशीरने दुसऱ्या दिवशी शानदार गोलंदाजी करताना भारताच्या वरच्या आणि मधल्या फळीला मोठे धक्के दिले होते. त्याने इंग्लंडकडून या डावात सर्वाधिक 5 विकेट्स घेतल्या. तसेच टॉम हर्टलीने 3 विकेट्स घेतल्या आणि जेम्स अँडरसनने 2 विकेट्स घेतल्या.

तत्पुर्वी इंग्लंडचा पहिला डाव 104.5 षटकात 353 धावांवर संपला होता.